A III Edición do Festival Canto Conto que se atopa incluído, como sempre desde o seu nacemento, na programación das Festas da Rosa, celebrouse onte “contando con dous momentos estelares nos que os cativos participante e as súas familias disfrutaron especialmente, que foron a actuación dos Titiriteros de Binéfar (Huesca) e a festa da auga, que fixo as delicias dos presentes nunha xornada na que o bo tempo e a calor foron os protagonistas”, explicaron a alcaldesa de Mos, Nidia Arévalo, e a concelleira de Cultura e Política Social, Sara Cebreiro.

A festa da auga que permitiu refescar a xornada de onte e que os nenos e nenas pasárano en grande foi posible grazas á colaboración de Rodrigo Iglesias, coordinador do Servizo Municipal de Emerxencias de Mos, que garantiu a diversión mediante o líquido elemento cos camións motobomba do Concello.

O festival infantil celebrouse nos exteriores do Pazo de Mos. Esta terceira edición contou coas actuacións de Titiriteros de Binéfar ás 12.00 horas, Mamis e Papis ás 16.00 horas, e Maimiñas e Xingro’s Big Band ás 18.30 horas.

As sesións de contacontos tiveron lugar ás 13.15 horas a cargo de Xarope Tulú e ás 17.30 horas a cargo de A Garavata Torta. Durante todo o día realizáronse obradoiros de arxila, elaboración de galletas e práctica de infinidade de xogos.

O Festival Canto Conto é un evento dirixido ao público infantil e familiar organizado por Reviravolta Producións. Celébrase no Concello de Mos dende o ano 2016, enmarcado dentro da súa semana grande: a Festa da Rosa, en concreto o terceiro domingo do mes de xuño.

Como o seu nome indica, neste festival teñen especial importancia os contos e a música, plasmados en contadas maxistrais e concertos de música en directo que, xunto con obradoiros e xogos, fan a delicias de nenos e maiores durante todo o día.

Os contos son uns dos protagonistas do festival. Dende a primeira edición, no ano 2016, foron moitos e bos os contadores os que pasaron polo festival: Servando Barreiro e a súa “Música das árbores” abriu este espazo no primeiro ano.

Ademais dos contos e concertos os nenos e nenas participan en diversos obradoiros, onde dan vía libre á súa imaxinación e aprenden cousas tan divertidas como os pasos de baile básicos do hip hop ou a maneira de facer música coas froitas.

Outro dos grandes protagonistas do Canto Conto son os concertos. En anteriores edicións estiveron grandes grupos e artistas como A Gramola Gominola, O Viravai, Xulio Lorenzo, As Maimiñas, Mamá Cabra, María FumaÇa, Paco Nogueiras, Uxía Lambona e a Banda Molona…

O festival é tamén un bo xeito de achegar aos nenos e nenas ao mundo da arte, por iso durante o mesmo fanse exposicións de artistas coñecidos, e os propios cativos son tamén autores de grandes obras de arte.

Nun evento como o Canto Conto cobran especial importancia a lectura e os libros como elemento de unión entre xeracións. Con espazos adicados a tal fin, non podían faltar os postos de libros para a venda.

O Canto Conto é un festival para desfrutar todo o día, e para que non se preste ningún momento para o aburrimento, tanto para nenos como para pais. Conta con postos de artesanía, xogos populares, pintacaras, obradoiro de arxila e mesmo lugares onde poder penicar algunha que outra cousa rica.