A campaña de sensibilización ambiental "Somos historias, somos sostibles", impulsada pola Deputación de Pontevedra, achégase este mes de agosto ao Festival Revenidas e a diferentes praias da provincia de Pontevedra. No Revenidas, en Vilaxoán (Vilagarcía de Arousa), estará este sábado 18 de agosto. Antes desta data, mañá xoves 16, estará en Barosa (Barro), e despois, chegará ata a praia de Menduíña (Cangas) o día 22, á praia fluvial de Ponte Caldelas o día 27 e á praia de Montalvo (Sanxenxo) o día 30 de agosto.

A través desta iniciativa, a institución provincial súmase ao rexeitamento dos plásticos e busca concienciar sobre a necesidade de coidar o medio ambiente. É unha campaña posta en marcha este verán e dirixida á poboación usuaria das praias da provincia, aos festivais RíasBaixasFests e ás Festas de Interese Turístico da provincia. O obxectivo é concienciar á sociedade sobre a necesidade da recollida dos residuos máis nocivos nestes entornos: as cabichas e os plásticos.

“Somos historias, somos sostibles” consiste nunha acción participativa, na que o público realiza accións de recollida de cabichas e plásticos, e a cambio, poden beneficiarse de sorteos de entradas para festivais na edición de 2019 ou outro tipo de premios similares. En cada lugar a onde se achega a iniciativa, móntase unha carpa de recepción personalizada, onde persoal técnico informa sobre os perigos dos plásticos e proporciona envases (fabricados con cartón ecolóxico e reciclable) para  recoller as cabichas e pequenos residuos.

Na carpa tamén hai soportes con información, datos, imaxes e gráficas sobre a campaña. Disponse ademais de urnas transparentes para o depósito dos residuos que van entregando os e as participantes. Enfocado ao público máis novo, tamén se están repartindo frisbees personalizados coa imaxe da campaña para difundila entre a rapazada.

En 2015, a produción mundial de plásticos chegou a 322 millóns de toneladas e espérase que, nos vindeiros vinte anos, esta cifra se duplique. Ante esta situación, dende a Deputación provincial quérese concienciar á sociedade na loita contra esta lacra e no respecto ao medio que nos rodea.