Os traballadores do 061 non piden gañar máis  nin mellorar as condicións previas ao traslado, só demandan que as condicións laborais e en materia de conciliación da vida laboral e persoal non sexan moito peores que as que tiñan en Santiago.

Os traballadores insisten en que o quebranto do traslado á Estrada debe ser o mínimo posible. Os traballadores do 061 non poden ser castigados cun traslado que en nada mellora a calidade do servizo pero si empeora as súas condicións laborais e familiares.

Os traballadores estatutarios do 061 insisten en denunciar que as súas condicións no traslado son peores que as da empresa Telemark e que as que se lle ofreceron aos cinco traballadores laborais.

De feito, xa na reunión do pasado 12 de xuño amosouse unha postura inamovible. Aos traballadores só se lles ofrece a equiparación co laudo arbitral da UTE Telemark-Spain, SL-Coremain, que é a empresa subcontratada por Axega. Neste laudo as cuestións sometidas a arbitraxe eran subrogación, limitación aos despedimentos, temas de xornada, compensación económica polo traslado do servizo, preferencia na contratación e cantidades indebidamente detraídas.

Pero, de todas estas cuestións, a única aplicable ao 061 é a de compensación económica polo mesmo importe que a empresa Telemark, de todos os xeitos, un importe que non cobre os custos reais de desprazamento que sofren os traballadores. Pero, ao non aplicarse o resto das condicións, os traballadores do 061 quedarían en peor situación que os de Telemark. Do mesmo xeito, as condicións dos cinco traballadores laborais, que xa teñen asinado un acordo, son obxectivamente mellores que as do persoal estatutario.

Por todo isto, piden que a Consellería de Sanidade se implique na busca dunha solución á situación para rematar con este longo conflito.