O pasado domingo 30 de setembro a Banda de Música Xuvenil de Xinzo ofreceu o último concerto-espectáculo deste ano 2018 no Auditorio Municipal de Ponteareas. Nesta ocasión, a agrupación contou coa colaboración de grandes artistas que acompañan, entre outros, ao afamado músico, compositor e cantante galego, Roi Casal. Ana Silva coa voz narradora, Pachi Cruz ao contrabaixo e Silvia Ferre como cantante, fixeron da creación do pianista e compositor Alfredo Susavila e os textos do escritor Fernando Lavandeira, unha delicia para os sentidos.

O publico presente, que encheu unha vez máis o Auditorio Municipal de Ponteareas, viuse asombrado pola posta en escea da propia da Banda de Xinzo. A beleza e a calidade interpretativa de temas da primeira liña da composición tradicional galega, como son “Lela”, “Por ti”, “Quen puidera namorala”, “Rosiña do mes de maio”, “Ramito de violetas”, “Meu amor é mariñeiro” e “Quizás”, asombraron unha vez máis a todos os asistentes durante practicamente as 2 horas que durou o espectáculo.

O Director da Banda de Xinzo, Javier Blanco, resalta que “con este concerto seguimos consolidando unha liña musical ascendente; o traballo de todos os músicos está sendo fantástico. A pesares de que cheguei á Banda de Xinzo hai menos de medio ano, estou moi contento coa capacidade organizativa de todo o equipo directivo, e sobre todo co nivel e talento musical co que conta esta agrupación”.

O Presidente da Banda de Xinzo, Francisco Represas, quixo agradecer públicamente ao peche do concerto o apoio, tanto organizativo coma económico, de tódolos socios da propia Banda de Música. “Gracias a eles, podemos dar un salto significativo na calidade da posta en escea dos concertos ofrecidos pola propia agrupación musical ao longo deste ano 2018”. Así mesmo, tamén agradeceu a colaboración do Concello de Ponteareas a través dos convenios económicos existente coa propia Banda de Xinzo e a súa Escola de Música.

Por outra lado, tamén destacar que o mesmo domingo 30 de setembro, a Coral Cantares de Xinzo, que depende da propia Banda de Música de Xinzo, participou no Festival de Corais de Pazos de Borbén, o que pon de manifesto a intensa actividade e masa social que está acadando a Banda de Xinzo, xuntado a máis de un millar de persoas de forma directa e indirecta. Representando así, todo un referente musical Galego.

Con este concerto, a Banda de Xinzo encarrila un final de ano coa mente posta no súa próxima cita, que será un concerto na tarde do próximo domingo 7 de outubro na cidade de Lugo con motivo das festas de San Froilán. Ademáis do concerto de Santa Icía o 24 de novembro e o de nadal o 29 de decembro, ámbolos dous no Auditorio do Centro Cultural de Xinzo.