O programa “En Ruta coa Depo” organiza esta fin de semana 8 novas excursións nas que participan 790 persoas de 9 concellos da provincia. Estas excursións permitirán ás persoas participantes coñecer novos lugares da provincia de Pontevedra.

Máis polo miúdo, 108 persoas da Asociación de Veciños da Parroquia de Orazo e da Asociación de Mulleres en Igualdade de Donsión visitarán a Illa da Toxa, darán un paseo en barco pola ría de Arousa (con degustación), e tamén irán ao Grove, ao Museo da Salga e o xacemento da Lanzada.

Tamén, 108 persoas da Asociación de Mulleres Xestas e da Asociación de Amas de Casa de Baiona visitarán o Castelo de Sobroso; Modariz-Balneario; os petróglifos de Gargamala, en Mondariz; e o castro de Troña, en Ponteareas.

Por outra banda, 162 persoas da Asociación Cultural A Feira e do Centro Cultural e Recreativo de Cabral irán a Cambados, ao Museo Etnográfico e do Viño, as ruínas de Santa Mariña Dozo, ao conxunto histórico de Cambados, á adega do pazo de Fefiñáns (con degustación) e ao Museo Muíño Mareas da Seca.

Tamén, 162 persoas da Asociación Mulleres Rurais Telleira de Dena e da Asociación de Mulleres Rurais Salvaterra de Miño Tempo Gañado visitarán o conxunto histórico de Cangas, a igrexa do Hío, o miradoiro da Costa de Soavela e Cabo Home; e Cabo Udra e Museo Massó, en Bueu.

Outras, 88 persoas da Asociación Mulleres Rurais de Paradela e da Asociación Pedra da Garza irán a Meis, ao mosteiro da Armenteira, á Ruta da Pedra e da Auga, aos muíños do Batán, ao monte do Castro e ao pazo de Señoráns.

Tamén, 54 persoas da Asociación Mulleres Rurais Dornelas coñecerán o conxunto histórico de Salvaterra do Miño e o parque da Canuda; o Centro de Interpretación do Viño e da Lamprea (Arabo) e as pesqueiras do Miño, en Arbo.

Outras 54 persoas da Asociación Xaruma visitarán, en Silleda, o castro de Toiriz, o mosteiro de San Lourenzo de Carboeiro, a fervenza do río Toxa e os escenarios da serie O final do Camiño.

E xa por último, 54 persoas do colectivo Alento visitarán o conxunto histórico de Pontevedra, o Museo de Pontevedra e a Illa do Covo.

“En Ruta coa Depo” ten por obxectivo mellorar a participación, a convivencia e a cohesión social dos distintos colectivos sociais da provincia , promovendo a igualdade de oportunidades para os colectivos con diversidade funcional, que antes non podían participar, así como ofrecer alternativas de ocio e tempo de lecer á poboación xuvenil da nosa provincia e promocionar rutas destinadas ás entidades de nais e pais que fomenten a convivencia e o intercambio de experiencias nas que participen activamente os nenos e nenas. O contido do programa consiste en pasar un día de convivencia pola provincia, mediante acompañamento dun ou dunha guía que conte coa habilitación de guía de turismo especializado de Galicia  e inclúe xantar e trasporte.

No 2017 participaron na iniciativa “En Ruta coa Depo” 17.501 persoas pertencentes a 410 entidades da provincia. Para este 2018 foron adxudicadas en total 19.814 prazas, 2.313 máis que no ano anterior.