A directora xeral de Calidade Ambiental e Cambio Climático, Cruz Ferreira Costa, fixo entrega esta mañá de dez galardóns, por importe de 20.000 euros, a dez concellos galegos que entregarán a senllas asociacións solidarias nos seus respectivos municipios. Este galardón é un recoñecemento ao esforzo realizado para incrementar as taxas de reciclaxe e recuperación de envases lixeiros deste municipios.

A Consellería de Medio Ambiente puxo en marcha a campaña Recicla, respira e supérate. Únete ao reto, impulsada en colaboración con Ecoembes, co fin de fomentar a reciclaxe de envases lixeiros nos concellos pola vía da concienciación e mediante diversas accións de impacto na rúa.

Ferreira Costa recordou que o obxectivo era que nos tres meses da campaña (maio, xuño e xullo), os concellos participantes tiñan que mellorar nun 10% a porcentaxe das achegas que fixeron ao contedor amarelo (envases de plástico, latas e bricks) no mesmo período de 2017 e, de logrado, recibirían como recompensa 2.000 euros, cantidade que podían destinar á causa social que elixan.

Tal e como explicou a directora xeral, os concellos de Redondela, O Barco de Valdeorras, Monforte de Lemos, Vilalba, Santiago de Compostela, Pontevedra e Lugo, reciclaron máis dunha tonelada de envases lixeiros (contedor amarelo) nos meses de maio, xuño e xullo; e destacou o esforzo de Redondela, que foi o concello que rexistrou o maior incremento porcentual con case un 45%.

Asemade, os concellos de Marín, Narón e Vilagarcía tamén recibirán este galardón por ter reducido a presenza de impropios no contedor de envases lixeiros (amarelo), que entregarán este incentivo á Asociación contra o Cancro, Centro de Recursos Solidarios de Narón e Cáritas Interparroquial de Arousa, respectivamente.

No caso de Marín, a porcentaxe de impropios reduciuse notablemente, ao pasar dun 67 ao 24%; en Narón, a mellora de recollida de impropios pasou do 28 ao 16%; e en Vilagarcía, do 34 ao 27%.

Cruz Ferreira mostrou a súa satisfacción porque a maioría dos concellos que participaron nesta campaña superaron o reto e agradeceu o esforzo e a participación dos concellos por potenciar este bo comportamento cidadá que ten efectos positivos para o conxunto da cidadanía.

Pola súa banda, o portavoz de Ecoembes en Galicia, Bruno de Llano, destacou que con esta campaña incídese na participación cidadá e amósase que con simples xestos, como o de depositar os envases no contedor adecuado, conseguimos entre todos mellorar a calidade do aire.