“Resulta curioso como o concello esixe a todos os veciños o correcto tratamento e reciclado dos cascallos, cando estes realizan obras, e o propio concello non cumpre este mandado cando se trata de traballos municipais; non dubidando en ensuciar e maltratar contornas que son públicas”. A reflexión da viceportavoz de ACiP, Raquel Bautista Alfaya, vén a conto da situación na que actualmente se atopa o parque da feira vello onde, desde hai tempo, amontóanse cascallos de obras municipais que se están realizando nunha rúa contigua.

“A contorna do parque da feira vello é frecuentado por pais e nenos durante a semana e é punto de encontro para mozas e mozos nas fins de semana. É máis, preto do mesmo hai un parque infantil, a gardería municipal e mesmo, durante as pasadas festas, neste parque habilitáronse carpas para actuacións, sen ningún tipo de tratamento destes residuos nin sinalización ou valado dos mesmos”, insiste Bautista Alfaya.

Para a concelleira de ACiP, “este é un exemplo máis da irresponsabilidade do goberno municipal e un abuso desmesurado do que é de todos. Non é de recibo este pasotismo e desde o noso partido esiximos aos responsables que retiren ese cascallo, onde mesmo hai obxectos punzantes, e que ofrece unha imaxe penosa para o pobo. Ou iso ou que, polo menos, valen a zona e a sinalicen antes de que ocorra algo”.