A Coral Polifónica Ventos do Val, da mosense parroquia de Petelos, realiza ao longo do ano varios intercambios culturais atendendo a peticións das agrupacións que así llo solicitan.

A Coral Ventos do Val, marcándose como obxectivo o de representar con orgullo ó municipio de Mos e cantar cancións do folclore galego  fóra da Comunidade Autónoma, desprazouse ata Extremadura onde foi moi ben recibida.

Concretamente foi a pasada fin de semana, os días 12, 13 e 14 de outubro, cando os integrantes da coral mosense viaxaron a Extremadura visitando Cáceres e Mérida; e actuando no Concello de La Garrovilla.

Na súa visita a Mérida os compoñentes da Coral Ventos do Val realizaron un ensaio no Anfiteatro Romano, polo que foron aplaudidos con entusiasmo polos moitos turistas visitantes que se atopaban no recinto deste emblemático conxunto histórico monumental.

Tras a actuación en La Garrovilla, a coral local e Ventos do Val cantaron xuntas O Voso Galo Comadre, e a coral de Petelos foi convidada a unha cea a base de productos típicos da zona. En agradecemento, o fin de festa correu a cargo dos membros de Ventos do Val, que realizaron a típica queimada galega.

Concerto de Santa Cecilia
Tras esta entrañable viaxe, Ventos do Val continúa coa súa axenda de actuacións musicais e o domingo 18 de novembro ás 18.00 horas celebrará o tradicional Concerto de Santa Icía (Santa Cecilia) no Multiusos de las Pozas. Acompañarán á coral de Petelos dúas agrupacións corais convidadas, a de Santa María de Pazos e Balde Rosa de Ponte Caldelas. Tamén contarán coa presencia do grupo de acordeóns da Escola de Música de Mos, Argonat Band.