En relación ao desaloxo das instalacións da Pirotecnia La Gallega, en Baldráns, o Concello de Tui quere manifestar a "ausencia de colaboración que está sufrindo por parte da Subdelegación do Goberno, titular das autorizacións en materia de explosivos".

Así, o Concello tras a visita que onte fixo á instalación a propiedade para desaloxar unha parte mínima do material existente na mesma, tivo coñecemento de que o Xulgado de 1ª Instancia e Instrución de Tui, que instrúe a causa pola explosión, ordenou á Subdelegación a retirada e destrución do material que foi depositado na pirotecnia pola propia Subdelegación tras ser encontrado en sendos zulos uns días despois do suceso do 23 de maio.

Dende o Concello considérase imprescindible recalcar que "ata o día de onte non se tivo coñecemento no Concello nin de que se ordenara o depósito do material atopado nos zulos na pirotecnia, nin de que o Xulgado ordenara á Subdelegación a retirada deste material. Resulta inadmisible que o Concello non conte con dita información tendo en conta que con data 3 outubro de 2018 un asesor municipal se personou na Subdelegación en Pontevedra para tratar a coordinación entre administracións, e que o mesmo día se solicitou unha reunión coa Secretaria Xeral desta Subdelegación, reunión á que acudiría o alcalde e os técnicos municipais, non téndose obtido ata a data resposta algunha por parte da administración estatal".

Dado que é o Concello, a través do seu alcalde, o que está obrigado a executar a sentencia do Xulgado do Contencioso Administrativo nº 1 de Pontevedra de 2014 que anulou a licenza de actividade e obras da pirotecnia, é cando menos moi preocupante que recaia no municipio a presión pola inexecución da resolución xudicial cando hai outra administración tamén responsable de executar actuacións relacionadas co desaloxo de material, e por tanto, coa propia actividade da pirotecnia, que non colabora, nin se reúne, nin subministra información algunha.

Estes feitos, "van ser postos en coñecemento do Xulgado do Contencioso Administrativo nº 1 de Pontevedra aos efectos que procedan e sobre todo cumprindo coas obrigas municipais en execución de sentencia".