O mestre do cinema xaponés Yasuzô Masumura é obxecto ata finais de novembro dunha retrospectiva no Centro Galego de Artes da Imaxe (CGAI)-Filmoteca de Galicia, que lle ofrece ao público seis títulos clave na súa extensa filmografía. Organizado en colaboración con Filmoteca Española e Japan Foundation, o ciclo Yasuzô Masumura. Retratos ao límite busca  afondar na particular ollada, en ocasións extrema e fóra do convencional, dun cineasta referente en Xapón, pero menos coñecido en Occidente.

Entre os seis títulos seleccionados para este programa, todos eles adaptacións literarias, atópanse algunhas das súas fitas máis difundidas internacionalmente, como Irezumi (Spider Girl, 1966), baseada no famoso relato Tatuaxe, de Junichiro Tanizaki, que poderá verse no CGAI o 22 de novembro; ou Akai Tenshi (The Red Angel, 1966), unha das que mellor exemplifica eses retratos ao límite que lle dan título ao ciclo, ao que lle porá o colofón o día 19.

Pero na Filmoteca de Galicia poderán verse, así mesmo, outras películas que non teñen conseguido tanta atención fóra do seu país, como Seisaku no Tsuma (Seisaku’s Wife, 1965), considerada porén como a súa obra mestra e unha das grandes películas xaponesas dos anos sesenta do pasado século.

En sesión dobre
Yasuzô Masumura. Retratos ao límite arranca esta mesma tarde coa proxección, ás 18,00 e ás 20,30 h., de Warm Current (1957), e completarase o día 14 con With My Husband’s Consent (1964) e 21 de novembro con Hoodlum Soldier (1965). As seis películas exhibiranse en sesión dobre, ás 18,00 e ás 20,30 h., e en versión orixinal xaponesa con subtítulos en galego.

A través delas dáse conta da sátira mordaz e da fluidez estilística que caracteriza a filmografía de Yasuzô Masumura (1924-1986), considerado precursor da Nova Onda xaponesa e alumno de Michelangelo Antonioni, Federico Fellini e Luchino Visconti durante a súa estadía como bolseiro no Centro Sperimentale di Cinematografía de Italia. Nas súas sesenta películas, abordou historias e xéneros moi variados nos que sempre imprimiu o seu particular selo, con elementos recorrentes como o seu compromiso ético, a recreación de comportamentos obsesivos ou o erotismo.

 

A escolma, que chega a Galicia en colaboración con Filmoteca Española e Japan Foundation, leva por subtítulo ‘Retratos ao límite’ para incidir na ollada particular e nada convencional deste cineasta 

 

Esta retrospectiva tamén lle permitirá ao público gozar dos traballos de Ayako Wakao, unha das grandes actrices xaponesas que, como sucede con Masumura, non é tan coñecida en Occidente. Con el protagonizou 25 películas, ademais de traballar con outros importantes nomes do cinema do seu país, como Kenji Mizoguchi e Kon Ichikawa, cos que precisamente se iniciou Yasuzô Masumura como director das súas segundas unidades.