O conselleiro de Economía, Emprego e Industria, Francisco Conde, lembraba a finais de outubro, na chegada da primeira etapa da II Volta a España en vehículo eléctrico que, a través das Directrices Enerxéticas de Galicia, búscase profundar no transporte limpo, potenciando a implantación do vehículo eléctrico e introducindo o gas natural como combustible para o transporte marítimo ou pesado. Isto permitirá, lograr un aforro económico de 162 millóns de euros ata 2020 e reducir en case 400.000 toneladas a emisión de gases contaminantes.

Francisco Conde destacaba esta iniciativa apuntando que demostra que este tipo de mobilidade é xa unha alternativa real para moitos consumidores. Así, as matriculacións de vehículos eléctricos en Galicia creceron máis do dobre que no mesmo período de 2017, e tamén as de vehículos híbridos, que supoñen un 31,8% máis que o pasado ano. En total, no que vai de 2018, Galicia conta con 2.000 vehículos matriculados entre eléctricos e híbridos.

 

As matriculacións de vehículos eléctricos en Galicia creceron máis do dobre que no mesmo período de 2017

 

Neste sentido, o conselleiro de Economía, Emprego e Industria felicitou a Endesa por organizar un evento que trata de dar visibilidade ás vantaxes da mobilidade eléctrica, o que, segundo apuntou Conde, deixa constancia do seu compromiso coa sustentabilidade, a innovación, o  medioambiente e o cambio climático.

Estes mesmos compromisos, tal e como lembrou o conselleiro, están recollidos nas Directrices Enerxéticas de Galicia, que teñen como obxectivo impulsar a transición enerxética en Galicia de forma progresiva e sustentable, apostando polas enerxías renovables, a eficiencia enerxética e a mobilidade eléctrica.