O próximo sábado 24 de novembro ás 20:00h, a Banda de Música Xuvenil de Xinzo (BMXX) ofrecerá no Auditorio do Centro Cultural de Xinzo o seu tradicional concerto de Santa Icía, patroa dos músicos.

Esta data tamén servirá, como é tradicional, para presentar aos novos integrantes da Banda de Xinzo, que neste ano serán cinco; Icía Montes e Mercedes Domínguez coa Trompa, Lucía Giménez coa Trompeta, Simón Bolívar González co Trombón, e Moisés García co Saxofón alto.

Nesta ocasión e baixo o título “ A BMXX Dende Dentro” o público presente poderá disfrutar da música en cadeiras cunha localización privilexiada. Javier Blanco, Director da Banda, explica que todo o público que así o desexe, poderase sentar entre os músicos de xeito rotatorio en cada unha das obras que se interpreten.

O repertorio escollido para a maior parte do concerto permitirá escoitar á banda tal e como a coñecemos, pero tamén veremos por separado ao grupo das madeiras e ó dos metais, e incluso veremos a sección de percusión tomando o control da escea. Por outra banda, as obras interpretadas serán de orixes moi diversos, dende o pasodobre galego ata a música americana, pasando pola música española e de orixe europea. E todo isto sen deixar de lado a dificultade técnica, que sen dúbida está a levar á banda a continuar avanzando semana tras semana. En definitiva, un repertorio didáctico, esixente e para todos os públicos.

Dende a Xunta Directiva da Banda de Xinzo, indican que esta innovadora iniciativa responde ao obxectivo de achegar a música bandística a toda a poboación, e en particular aos veciños e veciñas da parroquia Ponteareá de Xinzo. Canto maior arraigamento social teña a música entre a poboación da nosa área de influencia, maior será o crecemento que poderá experimentar a nosa Asociación, indica Francisco Represas, Presidente da Banda de Música Xuvenil de Xinzo.

Ao rematar o concerto, todos os/as socios/as e demáis afeccionados poderán disfrutar dunha cea no restaurante “Cuevas” de Bugarín (Ponteareas).