Esta semana celebrouse no salón de sesións do Concello de Mos a mesa de negociación da modificación da RPT (Relación de Postos de Traballo) municipal, que concluiu co visto bo do documento por parte da unanimidade dos membros integrantes da mesa. Así o informou a alcaldesa mosense, Nidia Arévalo, quen declarou estar “orgullosa de rematar así este ano 2018, con esta tan boa nova para o Concello, e logrando ademais o consenso de toda a mesa de negociación”.

A rexedora local avanzou ademais a este respecto que “agora, unha vez aprobado o documento pola mesa de negociación, convocarase unha Asamblea de Traballadores para tódolos traballadores/as do Concello de Mos, que se celebrará o vindeiro mes de xaneiro”. Arévalo espera “que esta Asamblea de Traballadores lle dea tamén o visto bo ao documento e continuar así avanzando neste procedemento de gran relevancia para o funcionamento da administración local”.

O Concello mosense leva meses traballando nunha actualización da Relación de Postos de Traballo, xa que o último documento data de fai case tres anos e dende entón existen na plantilla local novas situacións laborais que non se recollían no último texto. A última modificación da Relación de Postos de Traballo do Concello de Mos fora aprobada definitivamente en sesión plenaria de 25 de abril de 2016.

Desde o inicio do traballo necesario para a redacción deste novo documento actualizado e mellorado, celebráronse varias mesas de negociación cos sindicatos no salón de sesións da Casa Consistorial, incluída a de onte.

O Concello de Mos leva dende fai tempo traballando nesta nova mellora da Relación de Postos de Traballo e unha empresa realiza os labores necesarios para a nova optimización.

Esta empresa que se encarga da redacción da mellora da RPT mantivo reunións coa maioría dos traballadores e traballadoras para sondear as necesidades e opinións respecto dos diferentes departamentos municipais e estivo presente nas diferentes mesas de negociación celebradas no Concello.