O pasado 9 de Xaneiro, o Concello de Mos publicou no BOP unha oferta de emprego público para dúas prazas de Policía Local, unha convocatoria que, en opinión do BNG, "supón un malgasto innecesario para as arcas municipais".

De acordo "co principio de eficiencia e racionalización de recursos", o BNG entende que o Concello "debería solicitar un convenio de colaboración coa Xunta para traspasar a realización do proceso selectivo á Academia Galega de Seguridade Pública (AGASP), do mesmo modo que o están a facer a maior parte dos concellos de Galiza. Este procedemento, recollido no decreto 222/2017 da Xunta de Galiza, foi deseñado para evitar suspicacias de calquera tipo e non supón obriga económica algunha para o Concello, xa que é a Xunta quen asume todos os gastos derivados da organización do proceso selectivo" explican.

Segundo o BNG "con este procedemento, Nidia Arévalo e o PP de Mos obrigan ao Concello a asumir un gasto innecesario coas probas de acceso á Policía Local, poñendo ademais en dúbida a transparencia da convocatoria"