O PP de Salceda de Caselas cualifica de “vergoñante” e “lamentable” que o Concello “non se preocupase de organizar un campamento municipal de Nadal” durante as festas “para facilitar a conciliación laboral e familiar dos pais nos días nos que non houbo colexio”, critica o portavoz popular, Santiago Rodríguez Davila, quen considera que este “deixamento” mostra a ausencia total de “consideración” e a “falta de sensibilidade” cos veciños.

Para os populares, organizar un campamento municipal de nadal “debería ser lei de obrigado cumprimento cada ano” e facelo a prezos populares para que todas as familias que teñen que traballar nesas datas, e fundamentalmente aquelas máis necesitadas que non teñen con quen deixar aos seus fillos, “poidan beneficiarse deste tipo de servizos públicos que todo alcalde debería respectar e coidar, en lugar de gastar os cartos de todos en autobombo, publicidade e márketing”.

Prezo un 80% menor en concellos limítrofes

Este Nadal, segundo o PP, "as familias de Salceda víronse obrigadas a pagar 70€ por doce días, máis 49€ do servizo de comedor e 15€ de aula matinal, mentres que noutros municipios limítrofes o custo é moito inferior, ata un 80% menos grazas á colaboración económica do Concello".

O PP recomenda o Alcalde, como máximo responsable do Concello, que "deixe de utilizar" como “escudo” aos pais para esconder a súa “inactividade” ano tras ano, e non financiar parte do custo do campamento para “aliviar” economicamente "aos pais deste cargo porque vense obrigados a ir a iniciativa privada". “Moitas familias están a pasalo mal e teñen que pagar un alto custo para poder deixar aos seus fillos no campamento para poder ir traballar, non é xusto”.

Con esta “ausencia de xestión” do goberno local de Marcos Besada, Salceda tivo o “lamentable récord de ser o único municipio das comarcas do Baixo Miño, A Louriña e O Condado que non ofreceu aos seus veciños a posibilidade de inscribir aos seus fillos nun campamento de nadal a un prezo máis baixo” que os organizados por empresas privadas. Por este motivo, “moitas familias tiveron que inscribir aos seus pequenos no campamento de Salvaterra para poder ir traballar” porque o seu Concello non lles daba esa posibilidade”, critica Davila.