Nesta segunda entrega de “Hoxe con Manquiña” ficamos en Santiago de Compostela para coñecer a faciana máis íntima e persoal de toda unha deportista de élite, a atleta Esther Pedrosa.

Coñeceremos a persoa que a descubriu cando aínda era unha nena, falaremos co seu adestrador, e indagaremos na dura vida que rodea a unha deportista de élite e o seu día a día. Para iso preparamos un programa cheo de sorpresas e de encontros que nos dará moitos máis motivos para seguir admirando a esta atleta galega que segue competindo ao máximo nivel. Cun ritmo nada doado de seguir, Esther Pedrosa falaranos das súas armas: paciencia, constancia e sobre todo actitude.

Será a educación que levou sempre rodeada de nenos o que fixo desta atleta o que é hoxe? Quen a descubriu? Cal foi a súa primeira carreira? Cantas medallas de ouro gañou? Como compaxinou a súa vida como atleta coa súa faciana como nai? Este domingo, a faciana máis descoñecida de Esther Pedrosa na Televisión de Galicia, unha muller que non se amedrenta por nada, capaz a día de hoxe de seguir correndo e competindo a un gran nivel.

Hoxe con Manquiña

En “Hoxe con Manquiña” teremos a oportunidade de continuar a coñecer a faciana máis íntima e persoal dos nosos galegos e galegas máis famosos e recoñecidos. Neste novo espazo de Televisión de Galicia, ademais de indagar nos aspectos menos coñecidos dos nosos convidados, teremos tamén a ocasión de descubrir o seu punto de vista sobre fitos do pasado que viviron en primeira persoa e, como non, tamén da actualidade.

Ademais achegarémonos á xente da rúa para tratar de averiguar o que saben sobre os nosos convidados e contaremos cunha sección sorpresa para o entrevistado na que recibirán unha mensaxe de alguén moi especial e querido para cada un deles.