Movemento Oia, alerta do “lamentable estado en que se atopa o saneamento en Oia, a pesar de realizarse hai apenas 8 anos, a finais do ano 2010 cando entrou en funcionamento, cunha serie de supostas depuradoras que nunca estiveron en normal funcionamento, e que lle xera uns gastos moi importantes ao Concello, que lle privan de dedicar ese diñeiro a outros asuntos”.

Engaden que “provocando unha imaxe e contaminación lamentable. O Concello recepcionou e asumiu unha obra que non está ben feita”.

Dado que a rede de saneamento discorre neste caso polo camiño de Santiago portugués da costa á altura dun Monumento BIC, “cremos que é necesario que se tomen medidas”  explican.

Movemento Oia reclaman unha solución urxente dado que “estase imcumplindo a Lei de Patrimonio de Galicia aínda que, concello e administración tenten argumentar o contrario nos medios de comunicación”.

Tampouco, segundo movemento Oia, “se cumpre a lei de accesibilidade ao BIC”. “A imaxe que dá o Concello neste punto non é boa para os turistas e peregrinos que viaxan por este tramo do camiño. De nada serve gastarse unha chea de cartos en paneis e monólitos informativos se non solucionamos os problemas para a veciñanza” inciden.

O pleno solicitou recentemente e por unanimidade a Instancia declaración de conxunto histórico artístico vila mariñeira, de Movemento Oia, presentada a través do grupo mixto. “Para que o Concello solicite a declaración de conxunto histórico artístico que nos mesmos imos defender directamente no Parlamento de Galiza”.

Movemento Oia recomenda ao goberno municipal “que cumpra coa decisión tomada polo pleno e apoiada por todos os partidos políticos e que curse canto antes a correspondente solicitude ou encargue os estudos ou informes necesarios para que a instancia sexa aprobada pola Xunta. Isto permitirá acceder a subvencións que permitan poñer en valor toda a contorna entre outras cousas solucionar este problema en concreto que precisa un plan de protección especial”.