A alcaldesa de Mos, Nidia Arévalo, lamenta a "imaxe ofrecida en rolda de prensa o pasado sábado por representantes do PSOE, BNG e En Marea sobre o proxecto do Celta en Mo"s. Arévalo considera que “a foto que deron é a demostración clara da evidente politización electoralista deste tema”. O que ven refrendado polo feito de que ningún/unha concelleiro/a, de PSOE e BNG, integrante da Corporación Municipal actual estivera presente.

Da rolda de prensa, segundo a alcaldesa, vislúmbrase así mesmo que os tres partidos políticos desexan que sexa Vigo quen tutele a Mos. Esta conclusión extráese, entre outras, da declaración do socialista Abel Losada, quen dixo que co proxecto peligraría a auga da cidade olívica, cando a auga é de Mos e está xestionada polo Consorcio de Augas do Louro. “A auga é nosa, é a auga do Concello de Mos, e dende o goberno local mosense non consentiremos que Vigo nos tutele, nin neste nin en ningún outro aspecto”, reivindica Arévalo.

A rexedora local mosense salienta ademais as contradicións nas que están incurrindo estes partidos políticos ao dicir, agora, que non coñecen o proxecto, cando antes declararan que estarían a favor dun proxecto respectuoso co medio ambiente.

Nidia Arévalo insiste na defensa do municipio por riba de todo que se está a facer dende o Concello: “Nós defendemos e traballamos para un Mos de futuro, con máis emprego, economía, comercio, protexendo o monte e garantindo auga máis e mellor. Queremos que o Celta de Vigo se veña para Mos con todo o grandioso que iso significa, e sendo conscientes de que sería un proxecto desexado por calquera outro concello; pero sempre esixíndolle ao club respecto co municipio e coa veciñanza, por suposto”.

A alcaldesa afirma tamén que “pola súa banda, PSOE, BNG e GañaMos defenden os intereses de Vigo, e loitan para que Mos sexa un concello que non creza, para seguir expropiando, para seguir atravesándoo con infraestruturas para que sexa Vigo o que creza. Iso é o que están buscando e defendendo: un concello que sirva a Vigo, ao que mañá se lle poida expropiar para ter unha nova autovía, o AVE a Oporto…etc. Pero este goberno local mosense non o vai a permitir”, sentenciou Arévalo.

A alcaldesa asómbrase, así mesmo, de “que os candidatos do PSOE e BNG, que supostamente queren ser políticos de Mos, se presten a cumplir ordes de Caballero enganando e traizoando aos seus veciños. É incríble. Creo que os veciños de Mos non merecen portavoces, e moito menos gobernantes, como estes”.

Por último, a rexedora local fixo referencia ás declaracións do alcalde de Vigo esta fin de semana, nunha entrevista concedida a un medio local,  no que se refería ao proxecto do Celta en Mos dicindo que pretende perxudicar á cidade olívica. Nidia Arévalo declarou que “o que Caballero quere é impedir o progreso de Mos para que siga a ser a alfombra de Vigo e o PSOE mosense é o seu cómplice para tratar de frear o crecemento do municipio”. E pregúntase a alcaldesa, “PSOE, GañaMos e BNG que fan mentres o alcalde de Vigo actúa así? Ábrenlle a porta para que Mos siga a ser o municipio pisoteado e ninguneado”, lamenta Arévalo.

En referencia a Abel Caballero sentencia que “el defenderá ao seu concello, pero eu tamén estou entregada á defensa de Mos por riba de todo. En Mos, só hai un equipo e unha alcaldesa que poden defender os intereses da localidade, como levamos demostrando unha década”.

Arévalo concluiu asegurando que “teño claro que se eu non fora a alcaldesa de Mos e estivera o PSOE na Alcaldía, sería Abel Caballero o que gobernaría, converténdose o municipio mosense nunha parroquia das abandoadas de Vigo”.