Un incendio declarado nun pendello, situado na zona da explosión da pirotecnia de Tui, na parroquia de Baldráns, provocou danos no seu interior sen que se rexistrasen danos persoais.

Segundo a información facilitada ao 112 Galicia polos servizos de emerxencia que se achegaron ao punto, o lume calcinou obxectos de madeira e cartón empregados na elaboración de bombas de palenque sen que detectasen ningún tipo de material explosivo durante a súa intervención.

Foron varias persoas particulares os que contactaron co 112 Galicia para alertar do incendio ao fío das 15:25 horas e, decontado, o persoal do CIAE 112 Galicia pasaba o aviso aos Bombeiros do Baixo Miño, á Garda Civil, á Policía Local e aos Bombeiros e GES de Ponteareas.

Unha vez sufocado o incendio, os servizos de emerxencia arrefriaron e aseguraron a zona.