Centos de alumnos de cinco centros educativos participaron onte na 'X Carreira Solidaria' organizada polo CPI Arquitecto Palacios de Panxón con motivo da Semana da Paz e co fin de recadar fondos para colaborar co departamento de Servizos  Sociais do  Concello de Nigrán.

Na proba, á que asistiu o alcalde e o edil de Deportes, participaron ademais de alumnos do CPI do Centro de Educación Especial de  Panxón, do Juan María de Parada, da escola infantil  As Dunas e do colexio A Cruz de  Camos, todos correron tras achegar os seus patrocinadores adultos unha axuda para a causa.

"Estamos moi orgullosos desta iniciativa que ano a ano promove na nosa infancia valores como a solidariedade a través da práctica deportiva, por iso damos especialmente as grazas ao docentes pola organización e aos nenos pola súa participación imprescindible”, destaca o alcalde, Juan González.