A Deputación de Pontevedra únese á celebración do Día Mundial contra o Cancro Infantil, que terá lugar este venres, 15 de febreiro. Por este motivo, o Pazo Provincial, trala solicitude da Asociación “Nico contra el cáncer infantil”, iluminarase desde a noite do xoves e ata primeira hora do sábado de amarelo, a cor do ouro, que simboliza a fortaleza e resistencia das crianzas que se enfrontan a esta enfermidade e das súas familias.

Para a Deputación de Pontevedra este tipo de accións é un paso máis para visibilizar enfermidades como o cancro infantil e apoiar entidades que están a traballar para lograr unha maior cohesión social, mellorar a calidade de vida da cidadanía e impulsar melloras en canto ao diagnóstico, tratamento e investigación de enfermidades que afectan a colectivos tan vulnerables como a infancia. Deste xeito, o goberno de Carmela Silva quere sumarse ás iniciativas que dende a Asociación “Nico contra el cáncer infantil” están a desenvolver dende o ano 2015 tanto para impulsar una maior investigación como para garantir o dereito a un diagnóstico e tratamento preciso e a tempo.

Cada ano en España máis de 1.500 nenas e nenos reciben un diagnóstico de cancro, o que se traduce nun forte impacto para as crianzas e as súas familias.  Dende asociacións como “Nico” traballan para mellorar as técnicas de diagnóstico e os tratamentos, loitando por impulsar a investigación e aumentar, así a taxa de supervivencia que leva dende o ano 2000 estancada.  Deste xeito,  o 100% da recadación de “Nico contra el cáncer infantil” vai dirixida á investigación.

Xunto á iluminación de amarelo do Pazo Provincial da Deputación, está previsto que tamén se tingan do color do ouro outros espazos públicos en Vigo, A Coruña, Santiago, Ferrol e Ourense.