O Consello da Xunta autorizou  o proxecto de decreto polo que se declara a utilidade pública e se dispón a urxente ocupación dos bens e dereitos necesarios para a eliminación dun treito de concentración de accidentes na estrada PO-552, entre a glorieta de conexión coa AG-57 e Sabarís, nos Concellos de Nigrán e Baiona, cun investimento autonómico de máis de 400.000 euros.

Esta intervención fai necesaria a expropiación de 10 predios, e destínase unha partida de preto de 18.000 euros ao pagamento dos terreos. Nas vindeiros días está prevista a licitación das obras por parte da Consellería de Infraestruturas e Mobilidade.

Trátase dunha actuación que define a execución dos traballos de mellora da seguridade viaria e a eliminación dun treito cualificado como “punto negro” no tramo da estrada Vigo-Tui, comprendido entre os  puntos quilométricos 10+740 e 13+440.

Este proxecto está redactado no marco da estratexia que está a desenvolver o departamento de Infraestruturas da Xunta para intentar reducir os tramos de concentración de accidentes da rede autonómica de estradas.

 

Destacan entra as actuacións a execución dunha nova glorieta na rúa Rans, incorporada ao proxecto tras a información pública, a mellora na intersección co camiño Carballal ou a reordenación do cruzamento coas rúas Cruceiro e Sarmiento

 

Os traballos previstos neste tramo consistirán na mellora de interseccións en que se produce unha maior parte dos accidentes neste tramo. Executaranse cambios de sentido e habilitaranse carrís centrais de espera para facilitar os xiros á esquerda nas interseccións que teñen suficiente visibilidade, e reordenaranse os xiros naquelas interseccións que non teñen a visibilidade necesaria para garantir os xiros nas desexables condicións de seguridade.

Máis en concreto, executarase unha semiglorieta na intersección do punto quilométrico 10+740, para facilitar os cambios de sentido, e unha  nova glorieta no punto quilométrico 11+150, que se corresponde coa rúa Rans, incorporada ao proxecto tras a información pública.

Tamén se mellorará a intersección existente no punto quilométrico 11+500 co camiño Carballal, coa execución dun carril central de espera e semiglorieta, e reordenarase a intersección coas rúas Cruceiro e Sarmiento, coa execución dun carril central de espera. A actuación inclúe a sinalización dun cambio de sentido na intersección coa rúa Manuel González Prado, a execución dunha nova glorieta na intersección coa rúa Valle Inclán  e a reordenación da intersección coa rúa Romana.

Ademais, segundo o proxecto aprobado polo executivo autonómico, executaranse pequenos tramos de beirarrúas complementarios á mellora das interseccións, reforzarase a sinalización dos pasos de peóns do tramo para facilitar a súa percepción. E, finalmente,  instalaranse balizas entre os puntos quilométricos 13+180 e 13+440, para evitar o estacionamento indebido en varios accesos situados na marxe esquerda na avenida Foz do Miñor, que reducen a súa visibilidade.

Cómpre resaltar que, dentro da estratexia que o departamento de Infraestruturas da Xunta está a desenvolver para intentar reducir a accidentalidade nos “puntos negros” da rede de estradas de titularidade autonómica, se prevén outras dúas actuacións na estrada PO-552, no tramo Vigo-Nigrán. Trátase de intervencións similares no contorno dos tramos de concentración de accidentes, unha entre a intersección coas estradas da Matamá e Muíños e á entrada de San Miguel de Oia, xa licitada no mes de decembro, e  outra na zona das Rexas, cuxo proxecto se atopa en supervisión.

No marco do Plan de seguridade viaria de Galicia 2016-2020, a Xunta de Galicia está a desenvolver unha estratexia para intentar reducir ata 2020 a accidentalidade dos treitos cualificados coma tramos de concentración de accidentes das estradas de titularidade autonómica. Para iso, está prevista a execución de aproximadamente 40 actuacións en 90 km, cun investimento que superará os 12 millóns de euros, no horizonte desta lexislatura.

De seguido amósase o plano de detalle da actuación na estrada PO-552, entre a glorieta de conexión coa AG-57 e Sabarís, nos Concellos de Nigrán e Baiona: