Dende este pasado venres as entidades sociais centradas na promoción das mulleres e no apoio ao seu apoderamento poden solicitar as actividades incluídas no programa “Conectadas 2019”, cuxas bases reguladoras veñen de publicarse no Boletín Oficial da Provincia. Trátase dunha iniciativa que pon o acento na formación, desenvolvendo cursos e obradoiros sobre distintas cuestións para apoderar ás mulleres e dotalas das ferramentas necesarias para construír unha sociedade igualitaria. É un programa ao que este ano a institución provincial dedica 324.000 euros.

As entidades que poden participar en “Conectadas” son as asociacións, federacións e fundacións sen ánimo de lucro que teñen por obxectivo a promoción das mulleres e o apoio ao seu desenvolvemento e apoderamento, así como ao seu tecido asociativo e cuxo obxectivo final sexa a consecución da igualdade entre mulleres e homes. Cada entidade poderá presentar unha única solicitude, seguindo o modelo normalizado e a documentación establecida nas bases publicadas.

Cada entidade dispón dun total de 40 accións formativas distintas ás que optar, agrupadas en oito bloques temáticos: Muller Emprende, Muller e Cultura, Actualízate, Coas túas mans, Porque ti o fas, Súmate ao cambio, Ponte en forma e Coidados persoais. As accións terán unha duración de 35 horas. En cada unha delas poderán participar entre 20 e 25 persoas, establecéndose un mínimo de 15. Todas as accións formativas inclúen, de forma transversal nos seus contidos, o tratamento da igualdade efectiva entre homes e mulleres. Ademais, impártese un módulo obrigatorio de 5 horas de sensibilización na igualdade de oportunidades entre homes e mulleres.

No pasado ano 2018, o programa “Conectadas” chegou a máis de 4.500 persoas, a través de 306 entidades de 57 concellos da provincia.