“Imos!” Esta expresión, que é xa o lema da xestión do alcalde de As Neves, e candidato á reelección Xosé Rodríguez Méndez, resume o acto de presentación da súa candidatura para as Eleccións Municipais do vindeiro mes de maio.

Nun ambiente de esperanza, coa vista posta no futuro, cun equipo novo e con ganas e na compañía da voceira nacional do BNG, Ana Pontón, Xosé Rodríguez Méndez presentou este domingo as liñas do que agarda sexa o seu segundo mandato.

En primeiro lugar deu as grazas “ás mulleres e ós homes das Neves que estades aquí, pola vosa  confianza e apoio, nada tería sentido se non estades, traballando, empurrando, criticando, animando, construíndo esta sociedade diversa e plural, e provocando en min  o impulso necesario para facela mellor, mais xusta, cargada de futuro. Se vindes comigo, eu vou!”, dixo o alcalde.

Rodríguez apostou por un Concello transparente, participativo  Inclusivo, igualitario e diverso. “Un Concello de todas e todos”, no que, dixo, todos esteamos orgullosas e orgullosos de ser das Neves “teñamos a idade, a condición, e a orixe que teñamos. Traballando na creación do sentimento de pertenza, do orgullo de ser e de vivir aquí, con valentía,  con modernidade e respecto polo que aquí nos trouxo”.

O candidato do Bloque adiantou que o seu obxectivo é afianzar un Concello igualitario, “que incorpora xa o concepto da igualdade de xénero en todas as políticas”, e  quere  afondar con decisión,  nos valores do feminismo.

Xosé Rodríguez Méndez puxo a vista no futuro, en seguir a construción de espazos seguros e amables que valoren o entorno e protexan ás persoas. Adiantou que o seu obxectivo é o de  fixar poboación con emprego e servizos. Puxo a vista na creación de emprego, na aposta da educación-empezando pola nova Gardería de As Neves- na mellora da sanidade, na proxección das Neves, na confianza nas súas veciñas e veciños e en conquerir unha confianza que permita dispor dunha maioría que sexa a clave para seguir construíndo e avanzando.

Ana Pontón

Pola súa banda, a voceira nacional do BNG, Ana Pontón, logo de amosar a súa admiración e recoñecemento ás veciñas e veciños de As Neves, que souberon superar a adversidade logo do que fixo o lume no concello, salientou que o seu alcalde estivo sempre ao carón das persoas, facendo seus os problemas que tiñan e traballando para atopar unha solución.

Pontón subliñou que a xestión de Xosé Manuel Rodríguez Méndez “impulsou o cambio transformador de As Neves” e posibilitou que a vila sexa hoxe máis aberta, que se creasen máis oportunidades e que se abra un futuro “no que seguirá mellorando e transformando a vida das persoas”.