Un total de 12 empresas veñen de presentar as súas ofertas para executar os traballos de reforzo do firme en oito estradas da comarca do Condado-A Paradanta, así como no Concello de Tui, cun investimento de preto de 705.000 euros.

Este contrato da Consellería de Infraestruturas e Mobilidade contempla as actuacións necesarias para rehabilitar a capa de rodadura e mellorar o estado de conservación en distintos tramos localizados nas estradas PO-252, PO-254, PO-262, PO-400, PO-403, PO-404, PO-406 e PO-510, ao seu paso polos concellos de Mondariz, Ponteareas, A Cañiza, Salvaterra de Miño e tamén polo municipio de Tui.

No concello de Mondariz melloraranse varios tramos da PO-252, da PO-254 e da PO-262. En concreto, actuarase na estrada PO-252 entre os puntos quilométricos 3+820 e 4, e na PO-254 entre os quilómetros 0 e 7+300, que corresponde á travesía Bugarín, Prado e Pías, así como nos p.q. 8+500 a 9+480, na travesía de Mondariz, que tamén inclúe o tramo desta vía ao seu paso polo municipio de Ponteareas.
 

 

Tamén se actuará en treitos localizados nos viais da PO-400, PO-403, PO-404, PO-406 e PO-510, ao seu paso polos municipios de Salvaterra de Miño, Ponteareas, A Cañiza, e o Concello de Tui

 

Neste proxecto tamén se prevén intervencións na estrada PO-262 entre o p.q. 0 e o 3+500, no municipio de Mondariz, rehabilitándose a sección completa nos primeiros 500 metros deste tramo, que se corresponden coa travesía de Vilasobroso.

No municipio de Ponteareas se rehabilitará o firme da PO-403, entre o quilómetro 0 e o 10+800, mentres no Concello da Cañiza mellorarase o firme da PO-406, que coincide coa travesía do municipio.  E o Concello de Salvaterra de Miño verá mellorada a estrada PO-400, entre o p.q. 0+100 a 3+400, así como a vía de servizo da PO-510, dende o p.q. 9+300 e o 9+720.

Ademais, neste contrato tamén se inclúen obras de reforzo de firme na estrada PO-404, xa na comarca do Baixo Miño e ao seu paso polo Concello de Tui, no primeiro quilómetro da parroquia de Guillarei.

O departamento de Infraestruturas da Xunta continúa a traballar no obxectivo prioritario de conservar a rede viaria autonómica en óptimas condicións coa fin de incrementar a seguridade viaria e proporcionar aos usuarios unhas vías cómodas.