A Guarda inaugura este venres a nova Casa do Concello na “casa dos Alonsos”, lugar no que se atopan as dependencias municipais dende finais de 2018.

O acto de inauguración, que terá lugar ás 18:00 h na Praza do Reló, contará coa asistencia da Subdelegada do Goberno, a Directora Xeral de Administración Local, a Presidenta da Deputación de Pontevedra e a corporación local. Ao evento tamén están convidados, entre outras personalidades, alcaldes e alcaldesas da Comarca do Baixo Miño, así coma unha representación de ex-alcaldes, ex-concelleiros, empregados municipais, representantes de partidos políticos, asociacións e institucións públicas e privadas ligadas á vida municipal da Guarda.

Durante o transcurso do acto descubrirase unha placa conmemorativa, realizarase o corte simbólico da cinta na porta de acceso ao edificio e proxectaranse varios vídeos sobre turismo, historia e vida institucional da Guarda. Tamén haberá unha pequena exposición sobre fondos artísticos e publicacións municipais.

A Casa do Concello tivo ao longo da súa historia varios propietarios, pasando a ser propiedade municipal dende o ano 2001. Comezando as obras de rehabilitación no ano 2009 e rematando as mesmas o pasado verán de 2018. O edifico orixinal era unha «Casa Indiana» de arquitectura señorial urbana cunha elegante fachada de pedra nobre que foi conservada e restaurada.

Este novo edificio permite que, a partir de agora, a veciñanza da Guarda teña unha moderna sede municipal e dea uns servizos de calidade acorde cos tempos que vivimos.

Dende o Concello da Guarda convídase á toda cidadanía a asistir a este histórico acto de inauguración da nova Casa do Concello.