A candidata socialista ao concello de Salvaterra do Miño, Rocío Bernárdez, encheu a Casa da Cultura do Concello na súa presentación oficial, na que pediu “un cambio urxente de rumbo” para o concello. “Salvaterra ten que mudar, mirar para dentro e pensar na cidadanía; precisa dun goberno competente, que forneza ao concello dos servizos que precisa e que aposte por un urbanismo moderno e atractivo para captar e fixar poboación”.

“Estamos perdendo un tempo precioso para cambiar o PXOM, para quen se está a gobernar?" preguntábase a candidata socialista, que demandaba cambios urxentes no xeito de gobernar, poñendo á veciñanza no centro das decisións. “As veciñas e veciños non son a prioridade para o goberno do PP”, asegurou Rocío Bernández, quen destacou que é primordial incluír as parroquias no desenvolvemento de Salvaterra. “Depende de vós darlle o cambio que Salvaterra precisa”, concluíu.

Bernárdez estivo acompañada na presentación da súa candidatura por destacados cargos públicos socialistas como Carmela Silva, presidenta da Deputación de Pontevedra, quen destacou a importancia de que mulleres coma Rocío dean un paso adiante, "mulleres formadas, de valores, que defenden con paixón as súas ideas, e coas ideas é como se transforma a sociedade". "É moi importante que mulleres coma ela lideren naqueles ámbitos onde se cambia a sociedade”. “Sensibilidade social, formación e moitas ideas é o que trae Rocío para impulsar este concello que tanto potencial ten”, engadiu a presidenta da Deputación. “Salvaterra necesita alguén coma Rocío, que estea sempre no concello, sen o peso dun exalcalde ás costas, que escoite a veciñanza”. "Porque nunca tanto si investiu en Salvaterra como desde que estamos na Deputación pero a decisión de onde se invisten estes cartos depende do alcalde, e por iso precisamos unha alcaldesa como Rocío, que coñece o que os veciños precisan e que ten as ideas claras e un proxecto de futuro para Salvaterra".

A presidenta da Deputación de Pontevedra aproveitou a ocasión para pór en valor os case cinco millóns de euros investidos polo ente provincial no concello durante esta lexislatura, “respectando a autonomía municipal, repartidos de maneira equitativa e atendendo a criterios obxectivos” como o número de habitantes, a superficie e a dispersión da poboación.

Pola súa banda, David Regades, secretario xeral provincial e encargado de abrir o acto, asegurou estar orgulloso das candidaturas socialistas encabezadas por mulleres, “pois representan o compromiso deste partido co feminismo”, resaltando a figura da presidenta: “o PSOE na provincia está máis unido e máis forte ca nunca e iso é grazas a Carmela Silva”. 

Na súa intervención Regades destacou  o inmediato comezo dos traballos na PLISAN e o interese de varias empresas en trasladarse ao polígono, “o que garantirá non só postos de traballo senón traballo de calidade, apostando pola innovación e o talento”. Regades destacou neste sentido a importancia de fixar poboación no territorio e apostar por un urbanismo sostible e un modelo medioambiental no que o Miño está chamado a ser o protagonista. 

Bernárdez tamén contou co respaldo do secretario xeral galego, Gonzalo Caballero, quen destacou que Salvaterra precisa dun cambio progresista “e ese cambio leva nome de muller, o de Rocío Bernárdez. “Toca abrir as fiestras e cambiar a inercia na que leva instalado o Concello desde hai 40 anos”. “É o momento da ilusión e da mobilización para as eleccións que temos por diante, para conseguir unha maioría mais ampla para Carmela na Deputación”, concluíu.