A Xunta de Goberno da Deputación de Pontevedra vén de aprobar as bases que regulan as subvencións dirixidas a entidades sen ánimo de lucro para actuacións no ámbito dos servizo sociais, sociosanitarios e de mocidade na provincia de Pontevedra durante o ano 2019. Este ano, as subvencións contan cun orzamento de 499.000 euros.

Máis polo miúdo, nas bases aprobadas regúlase a concesión das axudas económicas en réxime de concorrencia competitiva para aquelas entidades que teñan como obxectivo realizar proxectos ou actividades orientadas á intervención, asistencia, integración social e laboral e de prevención e promoción do benestar dos colectivos que, atendendo ás súas especiais circunstancias, precisan dunha maior especificación técnica e interdisciplinar na súa intervención.

Os proxectos, programas e actividades das asociacións e entidades sen ánimo de lucro deben estar dirixidas aos seguintes colectivos: á familia e á infancia, ás persoas maiores, ás persoas con diversidade funcional, aos e ás emigrantes, inmigrantes e minorías étnicas,  ás persoas en risco de exclusión social, ás persoas con trastornos aditivos, á mocidade, aos asuntos sociosanitarios e, ademais, a aqueles outros problemas que poidan ser obxecto de intervención social.

Por último, as entidades terán un prazo de 15 días hábiles, a partires do día seguinte da publicación no BOPPO do extracto da convocatoria, para poderen solicitalas, ata un máximo de 6.000 euros por entidade.