O Centro Integrado de Atención ás Emerxencias (CIAE) 112 Galicia vén de rexistrar, desde as 13:00 horas de onte ata as 07:00 horas da mañá de hoxe, un total de 207  incidencias relacionadas coa meteoroloxía adversa que está a afectar á nosa Comunidade.

Por provincias, a de A Coruña foi a máis afectada con 104 incidencias rexistradas, Pontevedra con 84, seguida de Lugo con 11 e por último a provincia de Ourense con 8 incidencias contabilizadas. A tipoloxía máis repetida é a incidencia nas estradas provocada pola caída de árbores e pólas (84) e tamén obstáculos de pedra e terra nas vías de circulación (25) e bolsas de auga nas estradas (13).

En canto aos concellos onde máis se deixou notar o temporal neste período destacan, o de Vigo con 27 incidencias e o de Nigrán con 11. Por outra banda, A Estrada e Ames sumaron respectivamente  10 incidencias, Pontevedra 8, Santiago de Compostela 6 e Poio e Redondela 4 en cada unha delas.

Ningunha das incidencias provocadas pola meteoroloxía adversa revestiron gravidade. As árbores, pólas e bolsas de auga rexistradas sucederon maioritariamente en vías secundarias e fóronse solucionando a medida que foron intervindo os servizos de emerxencias.

Non obstante, cómpre salientar as incidencias reiteradas no sur da provincia de Pontevedra, con especial incidencia no concello de Nigrán debido a unha casa á que o vento provocou danos importantes no tellado e iso ocasionou a filtración da auga da chuvia.

Polo demais, tratouse dun intervalo de tempo caracterizada polas incidencias habituais producidas por unha borrasca que trouxo vento na costa, en terra e chuvias fortes.