Dende Movemento Salceda lamenta "o acontecido na Comisión Informativa celebrada o pasado 4 de marzo", pola negativa dos grupos da oposición (PP e PSOE) que votaron en contra do Recoñecemento Extraxudicial de Crédito que permitiría o pago de 998.883,87 € a diferentes provedores do Concello de Salceda.

De nada serviron as explicacións ofrecidas pola Concelleira de Facenda, Loli Castiñeira, manifestando a existencia de liquidez suficiente nas contas do Cocello para afrontar a totalidade do pago (2.116.246,98 €)

Denuncian dende Movemento Salceda "a enorme irresponsabilidade dos grupos da oposición antepoñendo unha vez máis os seus intereses sobre os intereses, neste caso, das empresas e autónomos que traballan para o Concello de Salceda".

Lembran dende o equipo de goberno que o Recoñecemento Extraxudicial de Crédito é unha figura legal para “evitar o enriquecemento inxusto da Administración”, tal e como aparece recollido no informe de intervención. O informe tamén recolle que “existe crédito suficiente nas aplicacións adecuadas do orzamento para 2019 para a imputación das obrigas cuxa aprobación se propón”.