David Regades dou conta ante o Comité Provincial celebrado onte sábado da actividade, tanto política como orgánica, da Comisión Executiva Provincial da que é secretario xeral. Regades resaltou o traballo feito ao redor de catro “eixos fundamentais”: a igualdade, a defensa das pensións, da sanidade pública e da educación.

O máximo dirixente provincial sinalou varias accións levadas a cabo pola executiva neste eido, “sempre traballando da man das agrupacións e da militancia” e con especial incidencia en promover o movemento social e activista, así como en mobilizar á militancia para a participación en diferentes protestas e manifestacións.

“Quero desde aquí tamén agradecer o traballo feito aos nosos representantes públicos, parlamentarios e senadores”, sinalou Regades, que puxo en valor o traballo feito en coordinación cos diferentes cargos públicos, tanto nas Cortes Xerais como na Deputación de Pontevedra e no Parlamento de Galicia. “Colaborando con eles puxemos en marcha diferentes accións e mocións co foco centrado na nosa provincia”, puntualizou o secretario xeral.

Regades destacou tamén a chegada de Pedro Sánchez á presidencia do Goberno central. “Desde Pontevedra imos contribuír, como xa fixemos ata agora, a que os próximos catro anos sexan catro anos de venres sociais que melloren a vida da veciñanza”, sentenciou o secretario xeral, que non tivo reparos en sinalar ao PP como “a dereita tóxica e nociva”.

Listas electorais

Neste Comité Provincial foron aprobadas por aclamación as listas para o Congreso e Senado, así como as dos concellos de máis de 50.000 habitantes. Regades felicitou ao partido por un proceso de elaboración de listas “exemplar” no que primaron “o diálogo e o consenso”.

A lista ao Congreso estará encabezada pola militante de Vigo Olga Alonso, ex secretaria comarcal de UXT e concelleira de educación, eido no que desenvolveu a súa labor profesional como directora dun colexio. O número dous será para Guillermo Meijón, e o tres para Ángeles Marra.

O histórico dirixente socialista de Arousa Modesto Pose, pola súa banda, encabezará a lista ao Senado, na que estará acompañado por Margarita Adrio e Daniel Chenlo.

Regades valorou positivamente o traballo feito por parte de todas as agrupacións para confeccionar unhas listas  “fortes” e que achegan “o partido á cidadanía”. “Todas e todos os que estades hoxe aquí poderiades formar parte desta lista”, asegurou o secretario xeral, que quixo destacar a “unidade” como un dos sinais de identidade destas listas.

Reforzo do partido a nivel interno

Regades fixo tamén un repaso á actividade orgánica feita desde o partido, poñendo como exemplo a creación dun servizo de asistencia xurídica, as xuntanzas de traballo comarca a comarca para coñecer as inquedanzas da militancia, a renovacións das sectoriais ou a realización dunha enquisa sobre necesidades das agrupacións.

A este actividade hai que sumarlle os protagonizados por diferentes cargos orgánicos e políticos do PSOE. Así, en outubro visitou a provincia Ander Gil, voceiro socialista no Senado, que estivo en varios concellos da provincia durante unha fin de semana de intensa actividade política. A estas visitas hai que sumar ás da vicepresidenta Carmen Calvo; o ministro de Agricultura e Pesca, Luis Planas; José Luis Ábalos, ministro o de Fomento e secretario de organización do PSOE; e a ministra de Sanidade, María Luisa Carcedo.

Regades non quixo esquecerse da celebración para a militancia organizada pola executiva a finais de setembro no Porriño. A Iª Festa da Rosa provincial contou coa asistencia de máis de 1.000 persoas e a participación da vicesecretaria xeral federal e voceira do Grupo Socialista no Congreso, Adriana Lastra.