Logo da presentación de Juan Carlos González Carrera como candidato á alcaldía de Ponteareas por ACiP, é momento tamén de coñecer o resto da lista de once primeiros aspirantes deste partido que chega ás eleccións municipais de 2019 máis preparado ca nunca para asumir o liderado no goberno da vila.

Alén de González Carrera, a listaxe inclúe, por esta orden, a Raquel Bautista, Jose Luis Rodríguez, Pablo Araujo, Ana Lorenzo, Manuel Gregores, José Luis Núñez, Montserrat González, José Fernández, Raquel Cabaleiro e Marcos Misa. Mestúrase así a veteranía e experiencia dalgúns membros que repiten, coa xuventude e inquedanzas das novas incorporacións que, de calquera xeito, cremos que aportan coñecementos dabondo para asumir os cargos para os que se postulan.

Para González Carrera “estamos ante un equipo que busca, ante todo, dar solucións aos problemas de todos os ponteareáns, dende os máis cativos ata os nosos maiores; os grandes esquecidos no actual goberno municipal da vila”.

Segundo o candidato á alcaldía por ACiP, “o obxectivo principal do noso partido é o de devolver a Ponteareas ao lugar de referencia que sempre ocupou. Por moitos motivos, historicamente a vila sempre foi estandarte na comarca, e temos que devolvela a ese lugar de liderado. E para iso queremos aplicar unha serie de medidas e políticas que fomenten o crecemento real do concello”.

ACiP chega as eleccións municipais de 2019 "co convencemento de que se poden cambiar as cousas, de que existe un xeito moito mellor de facer política para todos, e non só para uns poucos, como acontecía ata o de agora”.