O terceiro episodio da serie-documental Adegas da Memoria falará da vida na Ribeira e a cultura fluvial, así como a transformación que sufriron coa construción dos embalses nos anos 60. Farao a través de testemuñas de veciños de Vilachá, parroquia da Pobra do Brollón no corazón da Ribeira Sacra.

O episodio estará dispoñible online este xoves 18 a partir das 20:00. “Queremos amosar como os embalses e a consecuente modificación do río Sil, transformou totalmente a vida ribeirá, dende a actividade pesqueira ata as relacións entre os veciños de ambos lados do río” explica Iago Seoane, un dos realizadores da serie.

Equinoccio da primeira tempada

A serie documental Adegas da Memoria enmárcase nun proxecto homónimo que propulsa o Concello da Pobra do Brollón e a Asociación de Veciños de Vilachá para dinamizar a parroquia dende a perspectiva dos veciños. Ademais, coa colaboración do Incipit-CSIC, estase a realizar o primeiro gran estudo multidisciplinar sobre as orixes da Ribeira Sacra.

O episodio 3 que se estrea esta semana é o penúltimo da primeira tempada, ‘A Humanidade do Patrimonio’, na que son os veciños os que presentan ao espectador o seu territorio. O prólogo da serie e os dous primeiros episodios (Nacer viño e Somos soños) teñen cerca de 4.000 visualizacións.

“Trátase de ofrecer unha visión distinta da Ribeira Sacra, máis alá da prototípica imaxe de postal, e a cantas máis persoas podemos chegar, mellor”, comenta o técnico de cultura do Concello, Xosé Gago. “Nun momento tan crucial para a Ribeira Sacra pensamos que é fundamental dar voz e poñer o foco nas persoas que viven e traballan aquí.”

Os vídeos publícanse na web do proxecto (adegasdamemoria.com) e nas súas contas de Vimeo e Facebook (@adegasdamemoria).

Visitas guiadas gratuítas

Esta semana santa tamén haberá ocasión de coñecer Vilachá de primeira man, dentro do programa de visitas guiadas que ofrece o Concello da Pobra do Brollón. As visitas sairán este mércores, xoves e venres ás 11:00 dende as icónicas adegas de Vilachá. Comezarán cun pequeno paseo ata o miradoiro da Capela, con impresionantes vistas sobre o río Sil e as viñas. Á volta do paseo, que tamén pasará por outros lugares simbólicos de Vilachá, pararase nas adegas para admirar a súa arquitectura tradicional e para quen queira tomar un viño.

As visitas son gratuítas. O viño cobrarase, ou non, segundo criterio dos adegueiros. Para máis información ou reservas, os interesados poden contactar no teléfono 650624828.