Para Chus Garrote o Corpus debe vertebrar todas as accións de promoción turística do Concello de Ponteareas. Por este motivo cre necesario conectar a tradición máis senlleira e centenaria da vila do Tea coas novas tecnoloxías como mecanismo de difusión e promoción internacional que se complementa á perfección con outras como a confección de alfombras en países como Italia, Portugal e Bélxica.

Para a socialista os avances en realidade virtual a través dos teléfonos móbiles intelixentes (smartphones) é unha oportunidade única para achegarse a todos os recunchos do planeta. “Quero que calquera cidadán do mundo poida desfrutar das alfombras do Corpus Christi desde calquera punto parte do mundo” afirma Garrote.

Grazas a tecnoloxía 360 graos coa que por exemplo Google ofrece os Street View, os socialistas apostan pola súa aplicación para a creación dun espazo virtual co que pasear polas rúas alfombradas de Ponteareas en calquera época do ano. “Esta acción non só serviría para achegar a nosa tradición ao exterior, senón como reclamo para atraer máis turistas a nosa cidade. Isto suporía máis ingresos para o comercio, hostalería e hospedería. É dicir, máis economía local” asegura a candidata socialista á alcaldía.

Por outra banda, Garrote propón a creación dun Centro de Interpretación do Corpus para a experimentación e creación de alfombras con novos materiais florais. Así mesmo, a socialista aposta polos talleres de debuxo técnico e artístico gratuítos para os mestres alfombristas. “Debemos apostar polo Corpus en todas as súas dimensións” afirma Chus Garrote.