O produto final dun proxecto educativo dos alumnos de 4º da ESO na materia de Ciencias aplicadas á actividade profesional tivo coma resultado unha campaña a prol da compostaxe na que  traballaron todos os aspectos relacionados coa actividade, sempre coa idea de facer unha campaña na Vila de Gondomar para activar o uso das dúas composteiras comunitarias existentes no centro urbano.

As alumnas e alumnos deseñaron un logo co que se fixo un imán, elaboraron un tríptico explicando distintos aspectos da compostaxe e distintos carteis e panfletos para repartir e pegar nos distintos locais de Gondomar. Toda esta información será exposta no congreso de compostaxe do Proxecto Revitalízate da Deputación de Pontevedra que terá lugar na última semana de Maio.