“Mos precisa un goberno que estea durante toda a lexislatura e non que apareza nas últimas semanas antes das eleccións”. Victoria Alonso criticou con estas palabras as continuas ausencias da actual alcaldesa do PP, Nidia Árevalo, á que acosou de levar 10 anos “promesas baleiras” e non atender “as necesidades de Mos”.

“A veciñanza non lle reclama un novo centro comercial”, sinalou a candidata socialista á alcaldía, “senón melloras no alumeado público, humanización das rúas, canalización das augas pluviais ou soterramento do cableado”. “Iso é o que pretendemos facer nós”, comprometeuse Alonso, “cousas que ata o de agora non se están facendo”.

A socialista, que contou co respaldo de Abel Caballero e David Regades, pediu “o respaldo e a confianza” da veciñanza de Mos para demostrar que hai “outra forma de gobernar” e un equipo “novo, con ilusión, con ganas de poñer ideas en marcha” por e para a cidadanía.

“Queremos cumprir coas necesidades da veciñanza”, sostivo Alonso, como por exemplo que o acceso a internet con fibra chegue a toda a vila. “Imos facer realidade este compromiso”, finalizou tras agradecer o apoio brindado tanto pola Deputación que capitanea Carmela Silva, a Zona Franca, ao fronte da que se atopa Regades, e do alcalde de Vigo.

O secretario xeral provincial, pola súa banda, fixo especial fincapé na necesidade de brindar apoio aos sectores económicos de Mos, unha vila que precisa “un pulo para aproveitar a súa situación estratéxica”, preto de Vigo e na saída cara Madrid e Portugal.

“Temos que conseguir que a xente teña oportunidades nas súas vilas”, apuntou Regades. “Garantir empregos dignos é o primeiro paso para dotar de servizos á cidadanía e garantir os seus dereitos”, engadiu. Por iso, o tamén delegado do Goberno na Zona Franca de Vigo se ofreceu a traballar man a man “coa futura alcaldesa”, así como a exercer de interlocutor co Goberno de España.

Tamén Abel Caballero, alcalde de Vigo, quixo apoiar hoxe á candidata socialista á alcaldía, á que desexou “sorte” de cara as próximas eleccións, sinalando que é bo que haxa gobernos que poidan “dialogar e colaborar”.

“Xuntos podemos facer moitas cousas”, apuntou Caballero, que acosou á actual alcaldesa de Mos e ao seu goberno de non estar “ao servizo da súa cidadanía” senón respondendo aos intereses do seu partido.