A conselleira de Política Social, Fabiola García, sinalaba esta semana que a hospitalidade e a vontade de axudar definen á maioría das galegas e galegos. Díxoo na firma do novo convenio de colaboración coa asociación Solidariedade Galega co Pobo Saharauí (Sogaps) para a nova edición do programa Vacacións en Paz, que permitirá a 84 nenas e nenos procedentes dos campamentos de refuxiados de Tindouf (Alxeria) pasar o verán en Galicia con familias de acollida.

Con este acordo, a Xunta contribúe a que familias saharauís teñan a posibilidade de que as súas fillas e fillos gocen dunha estancia agradable, humana e culturalmente enriquecedora baixo o coidado en fogares galegos. Ademais de dar visibilidade á situación que actualmente viven estes menores, con este acordo promóvense valores como a tolerancia, o respecto, a convivencia e a integración, e axúdase a perfeccionar a aprendizaxe da lingua castelá e galega que estudan nos programas escolares.

 

Ofréceselles unha estancia agradable e enriquecedora, durante a que poderán gozar de máis alternativas de ocio e tempo libre, así como perfeccionar a aprendizaxe do galego e o castelán

 

A iniciativa tamén supón que as nenas e nenos participantes desfruten de maiores posibilidades de lecer e tempo libre que as que teñen no lugar de onde proceden. Ademais, evítase a súa estancia nos campamentos de Tindouf durante os meses de xullo e agosto, cando o as temperaturas máis altas poden chegar a superar os 50º graos.

A Consellería de Política Social achega 75.000 euros a Vacacións en Paz, o 80% dos cales son satisfeitos de maneira anticipada para garantir a posta en marcha do programa e o traslado dos menores. Así mesmo, a Xunta aproveita esta iniciativa solidaria para difundir entre as familias que reciben menores saharauís o programa de acollemento de nenas, nenos e adolescentes que están baixo a protección da Administración autonómica.