Un total de tres persoas faleceron a noite pasada despois de envorcar o vehículo no que viaxaban ao saírse da vía, á altura de Teis, na AP-9, dirección Vigo. Foi precisa a intervención dos Bombeiros para liberar do interior do turismo a dúas das vítimas, a terceira, saíu despedida do turismo sinistrado. Ademais, no vehículo viaxaban outros dous mozos que resultaron feridos e foron trasladados polos servizos sanitarios ao Hospital Álvaro Cunqueiro de Vigo.

O accidente ocorreu sobre as 21:30 horas deste mércores. Foi a esa hora cando varios particulares chamaron ao 112 Galicia para alertar dos feitos. Informaban dun coche envorcado sobre a mediana da Autoestrada.

De inmediato, desde o 112 ademais de alertar ao 061-Urxencias Sanitarias, informouse aos Bombeiros da cidade e de Baixo Miño,  Garda Civil de Tráfico, Policía Local e Protección Civil de Vigo e Redondela e ao persoal do servizo de Autoestradas. Tamén, se solicitou a intervención do persoal do Grupo de Intervención Psicolóxica en Catástrofes e Emerxencias (GIPCE) para prestar apoio ás familias das vítimas.

Condutor indisposto ao volante
Un home necesitou asistencia sanitaria ao sufrir unha indisposición mentres conducía o seu vehículo á altura do número 1 do Camiño das Cardosas, en Santo André, Redondela. O condutor tras sentirse indisposto, saíuse da vía e bateu contra un farol de alumeado público.

Unha persoa particular foi quen contactou co 112 Galicia para informar dos feitos, ao fío das 20:15 horas da tarde de onte. De inmediato, os xestores do CIAE 112 puxeron os feitos en coñecemento do 061-Urxencias Sanitarias, dos axentes da Policía Local e tamén dos membros de Protección Civil da localidade.

Nada mais chegar ao punto, os profesionais sanitarios estabilizaron á persoa para ser trasladada nunha ambulancia medicalizada ao centro hospitalario de referencia.