Tras a celebración esta mañá da sesión organizativa do Pleno do Concello de Mos, dende o Partido Popular de Mos considérase lamentable que, tras reducir unha dedicación exclusiva, o único problema da oposición sexa agora a subida do IPC no soldo da alcaldesa.

Dita suba, correspondente ao IPC, e que se aplica anualmente de xeito automático a todos os asalariados de España, supón un incremento de 8 euros mensuais a maiores do que a rexedora local mosense, Nidia Arévalo, cobraba na pasada lexislatura.

Os populares de Mos fan un apunte especial á socialista Victoria Alonso, lembrándolle que a alcaldesa cobra 2.500 euros mensuais, mentres que os deputados da pasada lexislatura da Deputación Provincial de Pontevedra presidida por Carmela Silva, cobraban 3.076 euros por dedicación parcial e 4.272 euros por dedicación exclusiva ó mes; tendo moita menos responsabilidade e carga de traballo que un alcalde ou alcaldesa. E concluíron declarando que “esperaremos ao mes que ven cando se saiba canto vai cobrar Alonso como deputada provincial para facer a comparativa”.