O conselleiro de Economía, Emprego e Industria, Francisco Conde, participou este venres en Ferrol no IV Hub Galician Offshore International, un dos principais foros de coñecemento e divulgación da eólica mariña -participan 300 empresas- no que puxo en valor a recuperación do liderado do naval grazas a súa aposta pola innovación, a diversificación e a formación, tres eidos nos que a industria contou co apoio da Administración autonómica.

De feito, Conde indicou que o esforzo, o traballo e compromiso dos estaleiros, as empresas auxiliares e os traballadores para transformar ao sector e a súa aposta pola Industria 4.0 permitiu que Galicia sexa hoxe en día un referente internacional na eólica offshore e que a Marca Galicia forme parte de proxectos estratéxicos de transcendencia mundial. “Galicia sabe interpretar os retos de futuro que pasan pola innovación e a diversificación e está tomando o liderado”, engadiu.

O titular de Economía explicou na súa intervención que a industria naval é na actualidade en Galicia fonte de riqueza e de creación de emprego cunha carteira de pedidos en vigor que supón máis da metade dos contratos de España e que conta con case 40.000 persoas afiliadas á Seguridade Social.

Conde indicou que o sector naval é unha prioridade para a Xunta que está apoiando a innovación a través de dous programas que axudaron a mobilizar 17 millóns de euros: as dúas Unidades Mixtas de Investigación -a que se leva a cabo coa Universidade da Coruña (UDC) para implantar o estaleiro do futuro e a que se desenvolve con Aimen para realizar novos procesos de fabricación e produtos-; e o programa Fábrica Intelixente do que Navantia acaba de resultar beneficiaria. Este proxecto permitiralle avanzar no Estaleiro 4.0 e fabricar compoñentes navais complexos, como a liña de fabricación de jackets.

 

Pon en valor o esforzo, o traballo e o compromiso dos estaleiros, as empresas auxiliares e os traballadores, co apoio da Xunta, para transformar o sector e poñer en marcha o estaleiro do futuro

 

No eido da diversificación, o conselleiro lembrou que Wikinger, da man de Iberdrola, supuxo “un antes e un despois” porque foi o proxecto que abriu a porta a Navantia cara o sector offshore e grazas ao que se acadaron outros pedidos coa noruega Statoil, Siemens, o contrato de Iberdrola para o East Anglia One, a plataforma para EDP que se atopa na súa fase final ou o proxecto Cobra, que arrancará proximamente (Kinkardine, en Escocia).  

Formación de calidade
Conde, en terceiro lugar, referiuse á importancia da formación de calidade lembrando que Galicia conta hoxe con máis traballadores e traballadoras preparados para afrontar novos retos “nun sector en pleno crecemento”. Neste ámbito, puxo en valor que a Xunta está a investir 1,7 millóns de euros en 111 Unidades Formativas na Empresa no sector naval para mellorar a cualificación de 718 alumnos e alumnas. Tamén recordou que desde 2017 o Plan de formación específico para o naval logrou a formación de 3445 persoas a través de 343 cursos e un investimento de máis de 15 millóns de euros.

Para rematar, o conselleiro destacou a importancia de seguir na “senda da colaboración” con todas as administracións para permitir á industria naval da ría de Ferrol acompañar a expansión internacional de empresas como Iberdrola, ao igual que Navantia-Windar demostrou formar unha alianza estratéxica que ofrece, en palabras de Conde, garantías, calidade, seriedade e cumprimento.  Sinalou a necesidade de seguir neste camiño porque a eólica offshore, pola que apostou a Xunta desde o principio, abriu unha nova porta ao estaleiro e á industria auxiliar da comarca, creou novas oportunidades laborais e consolidou Galicia como un hub de eólica offshore en Europa. Así mesmo, subliñou que para a Xunta é unha prioridade apoiar todos os proxectos que supoñan unha carga de traballo para Navantia.