O secretario xeral para o Deporte, José Ramón Lete Lasa, visitou esta semana o concello pontevedrés de Baiona onde asinou co seu alcalde,  Carlos Gómez, o convenio para acometer a instalación dun equipo de megafonía no pavillón deportivo municipal.

Segundo o texto do convenio, o Concello de Baiona dispón dunha zona deportiva na que se atopa o pavillón municipal onde se instalará un equipo de megafonía. O pavillón amosa un aspecto renovado tras a reforma integral levada a cabo en 2013. O seu ximnasio conta cunha gran oferta  con preto de 1.000 socios. Esta é unha zona referente en canto a volume de utilización por parte dos veciños para a actividade deportiva polo que a obra de mellora da instalación atraerá a un maior número de cidadáns. O importe total das actuacións ascende á case 16.000 euros (15.941,38 euros) que serán achegados integramente pola Xunta de Galicia.

A Secretaría Xeral para o Deporte realiza unha aposta decidida neste 2019 polas infraestruturas deportivas. Nos orzamentos iniciais de 2018 destinábanse un total de 2.833.043 euros para a construción e a mellora das infraestruturas deportivas de Galicia  Para o exercicio 2019, a Secretaría Xeral para o Deporte destinará unha contía de 3.934.217 euros -un 40% máis que o destinado inicialmente en 2018-. En total, na provincia de Pontevedra realizaranse obras en 22 concellos que alcanzarán os 1,35 millóns de euros e nas que participará a Secretaría Xeral para o Deporte a través dunha achega de ao redor de medio millón de euros.