O conselleiro de Economía, Emprego e Industria, Francisco Conde, coñeceu onte en Marín o traballo que desenvolven os 40 empregados do Centro Especial de Emprego Juan XXIII, un colectivo que forma parte de Fademga e que leva anos impulsando o desenvolvemento integral das persoas con capacidades diferentes facilitando e promovendo a súa inclusión social e laboral e dando apoio ás familias. Conde avanzou na visita que a Xunta porá en marcha este ano un novo programa de formación dual nos centros especiais de empregos co que se ofrecerá unha formación adaptada á demanda empresarial e prácticas nun posto de traballo co obxectivo de capacitar a 80 persoas a través dun investimento de 3 millóns de euros nos próximos tres anos.

O titular de Economía sinalou que a verdadeira inclusión só é posible cando se fala de inclusión laboral e, por iso, indicou que é preciso e xusto que todos os galegos e galegas, sen excepcións, poidan ter oportunidades laborais. Neste senso, puxo en valor o traballo que realiza Juan XXIII, que conta con 30 xardineiros que realizan, entre outras actuacións, labores de mantemento, limpeza de camiños en contornos rurais e o desbroce de fincas e montes en campañas de prevención de incendios.

 

A nova iniciativa da Administración autonómica ofrecerá formación adaptada á demanda empresarial e práctica nun posto de traballo co obxectivo de capacitar a 80 persoas a través dun investimento de 3M€ nos próximos tres anos

 

Conde, ademais, apuntou á necesidade de avanzar en dúas direccións: na sensibilización da sociedade e do tecido empresarial para que o emprego inclusivo sexa máis que un compromiso; e no deseño de medidas que se adapten ás necesidades reais do mercado laboral e ás das persoas con capacidades diferentes.

O conselleiro indicou que Galicia cre no emprego inclusivo porque para que a Comunidade avance necesita contar con talento e coas habilidades de todos. Neste senso, a Xunta destina este ano máis de 22 millóns de euros a programas específicos para promover o emprego das persoas con capacidades diferentes en centros especiais de emprego.

A Consellería de Economía, Emprego e Industria, ademais, ten en marcha o programa Galicia Emprega a través do que se reservan dous millóns de euros para ofrecer incentivos de 8000 euros para a contratación inicial deste colectivo nas empresas galegas e 16.000 euros para contratos indefinidos dos que se prevé que se beneficien 180 persoas.

Conde, para rematar, incidiu na importancia de dar visibilidade ao emprego inclusivo e en seguir traballando con asociacións como Juan XXIII e Fademga para promover xuntos un mercado laboral inclusivo.