A obra A casa  xunto  ao volcán impúxose por unanimidade aos demais orixinais presentados nesta segunda edición que será publicada pola Editorial Galaxia o próximo outono.

Reunido nas dependencias municipais do Concello de Redondela o pasado sábado 29 de xuño, o xurado composto polas escritoras Iolanda  Zúñiga e Anna  R.  Figueiredo (gañadora da pasada edición), a xornalista María Jesús Argibay, a profesora Patricia Arias  Chachero, e a editora  Malores Villanueva decidiu declarar gañadora a obra A casa  xunto  ao volcán do autor Xosé Ricardo Losada.

O xurado destacou a fortaleza dunha voz feminina en construción que evoluciona ao longo do relato na busca da súa identidade. A través dunha adolescente o autor móstranos o pensamento crítico dunha sociedade na que a filosofía pode e debe ter un papel relevante e necesario. Losada logra ademais unha voz feminina plenamente crible e sorprendente. A casa  xunto  ao volcán é unha novela rebelde que convida a cuestionarse a orde social establecida.