A secretaria xeral da Igualdade, Susana López Abella, asinou o pasado venres un convenio de colaboración co presidente de Aliad-Ultreia, Manuel Varela, que ten como obxectivo o mantemento dun dispositivo de acollida para mulleres vítimas de explotación sexual ou trata.

A través deste acordo, a Xunta destinará 35.000 euros para que se siga prestando este servizo integral de atención, apoio, acollida e recuperación das mulleres. Con este recurso, facilítaselles ás mulleres aloxamento e acceso a atención educativa, psicolóxica, social, formativa e laboral.

Desta forma, as mulleres poden dispoñer dun espazo de acollida e cubrir as súas necesidades básicas, mentres contan con acompañamento durante este proceso de saída, autonomía, e reinserción socio-laboral. En concreto, o dispositivo funciona como unha residencia temporal e como un espazo de seguridade de transición no que as mulleres están apoiadas por profesionais para topar unha saída en función das súas preocupacións e necesidades.

Esta medida enmárcase no desenvolvemento que se está a facer dende a Xunta de Galicia do Pacto de Estado contra a Violencia de Xénero.