“Este ano volvemos estar de festa cun Marisquiño aínda máis potente, por difícil que pareza, que as edicións anteriores”, asegurou a Presidenta da Deputación de Pontevedra, Carmela Silva, esta mañá durante a presentación do Marisquiño 2019 na pista de skate do parque de Navia, en Vigo. A Presidenta provincial presentou un dos eventos que forman parte do circuíto de Festivais Rías Baixas promovido pola Deputación, acompañada polo alcalde de Vigo, Abel Caballero, o delegado do Consorcio da Zona Franca de Vigo, David Regades, o director do Marisquiño, Joako Ezpeleta, e a deputada de Turismo Rías Baixas, Ana Laura Iglesias.

Carmela Silva tamén felicitou á equipa do Marisquiño, que se celebra entre os días 9 e 11 de agosto no porto marítimo da cidade olívica, “polo seu cartel, no que quero que toda a xente repare, xa que representa a unha muller skater. Deste xeito, simbolízase o labor do Marisquiño pola promoción da igualdade e da visibilidade das mulleres, un sinal de identidade do festival”. A Presidenta provincial lembrou que “este ano a Deputación de Pontevedra volverá levar o seu proxecto contra as agresións sexuais e as violencias que sufrimos as mulleres”, as campañas ‘Lembra! Eu decido, ti respectas’ e ‘Conta comigo, eu respéctote’, “cun stand onde axentes de igualdade informarán sobre outro mundo no que os seres humanos nos relacionamos desde o afecto e non desde a dominación”. O cartel do festival, inspirado na carteleira rusa dos anos 40, forma parte das accións da Deputación de Pontevedra para a promoción da igualdade no Marisquiño.

Carmela Silva salientou a súa capacidade de atracción “con persoas de todo o mundo que veñen a Vigo” e tamén “o seu seguimento a través do streaming e de televisións de todo o mundo”. O Marisquiño, asegurou, “é un evento mundial que fai que Vigo sexa unha gran referencia do deporte urbano, porque con el celebramos os días grandes do deporte e da cultura urbana, e que está organizado por persoas con talento, con ideas e con moito traballo para construír un festival que é a envexa de moitos lugares”. Por iso “estou encantada”, afirmou Carmela Silva, “de que este sexa un dos grandes eventos nos que participa a Deputación de Pontevedra, á que o alcalde pediu que apoiara o Marisquiño con forza porque sempre tivo claro que era un grande evento”.

Pola súa banda, o alcalde de Vigo, Abel Caballero, asegurou que “seguiremos apoiando o festival todos os anos e faremos o que sexa necesario para que se siga celebrando en Vigo porque iso é o que quere a xente”. O rexedor puxo en valor que “o Concello e a Deputación apoiamos o Marisquiño con preto de 500.000 euros”, dos que a Deputación achega 181.5000 euros, “xa que ademais do apoio loxístico o económico tamén é moi importante”. O director, Joako Ezpeleta, asegurou que “a seguridade está garantida ao 100% porque traballamos para que non houbese ningún perigo para deportistas e para público. Triplicamos o noso orzamento dedicado á seguridade e traballamos conforme a todas as normativas cun esforzo moito maior”.

 

Carmela Silva asegurou que Vigo acollerá “os grandes días do deporte e da cultura urbana” con “moita festa e sendo aínda máis potente que anos anteriores”

 

O Marisquiño é o maior evento de cultura urbana e deportes de acción do sur de Europa e nel despútanse ata tres copas mundiais: a World Cup Skateboarding Street, a World Cup Skateboarding Miniramp e o Dirt FMB World Tour, todas elas puntuables en clasificacións internacionais e nas que se dan cita as e os mellores riders nacionais e internacionais. Ademais, dende o ano pasado súmase unha nova disciplina deportiva, o Basket 3x3 da FIBA, que en Tokio 2020 será olímpica. Nelas participarán deportistas de máis de 30 nacionalidades.

A Deputación de Pontevedra tamén estará presente no Marisquiño o 9 de agosto coa campaña “Experiencias SOStibles”, que promove o descenso do uso de plásticos, con accións de sensibilización e co reparto de materiais alternativos aos plásticos dun só uso, como as bolsas de tea, e utensilios que reduzan o impacto ambiental humano, como as eco-cabichas.

Ademais do deporte, O Marisquiño tamén acollerá actuacións como as de Nahno Selectah,High Paw, Yawners, Kaiko, Awwz, Fusa Nocta, Eric Bobo, Jota Mayúscula, Skank-Fu Hi-Fi Sound System, Ramiroquai DJ, Fran Laoren, Kyotto, Fran Laoren, Mery Oaks, Niña Coyote, Biznaga, EME DJ,Judah GT, DL Blando ou Grobas, entre outras apostas; un “Village Market” onde se desenvolverán e darán a coñecer proxectos relacionados coa cultura urbana e o deporte; e tamén 4 zonas gastronómicas, con food trucks e degustacións gastronómicas.