O Concello de Porriño está en trámites a través da Federación Galega  de Municipios e Provincias (FEGAMP) para a súa adhesión ó protocolo “Concellos Doing Businnes” que ten que levarse a pleno para a súa aprobación definitiva. David Alonso, alcalde accidental de Porriño ata o vindeiro luns e concelleiro delegado de Emprego desmintiu ó Partido Popular que a través dun comunicado traslada que o goberno municipal “negaríase a implantar ésta entre outras medidas de apoio empresarial”.

“O voceiro da oposición descoñece ou ignora que hai un decreto da Alcaldía que solicitou á FEGAMP a adhesión o devandito protocolo e que ainda resta a súa aprobación polo pleno que levaremos á sesión de setembro”, manifestou o alcalde en funcións.

O Goberno Municipal volve a lamentar a “espiral de fotos con consellerios da Xunta de Galicia –algunha imaxe claramente sacada do arquivo como denuncia a vestimenta invernal- na que o voceiro local do PP tense instalado para facer unha oposición de pataleta permanente”.

Por outra banda, David Alonso tamén desmentiu outra información viciada do PP que tén afirmado que os traballadores de “Ascan” non tiveran cobrado ainda a nómina de xullo”. “É rotundamente falso: a plantilla da concesionaria de limpeza e desbroces cobrou os seus salarios o pasado día 15”, contestou o alcaldes accidental do Porriño.