O vicepresidente da Xunta, Alfonso Rueda, anunciou que o Consello aprobou esta semana unha orde de axudas que suporá un investimento de 20,5 millóns de euros nos centros de investigación do Sistema Universitario Galego para o período 2019-2022, o que significa o maior investimento público realizado ata o de agora no sistema científico universitario galego.

O vicepresidente da Xunta destacou que este investimento, un 66% maior que na anterior convocatoria en termos relativos, suporá un salto cualitativo e cuantitativo no impulso do que son os maiores axentes científicos de Galicia e, ademais, “avánzase na consolidación dunha estrutura de I+D+i máis forte e competitiva no ámbito estatal e europeo”.

Nesta mesma liña, Rueda explicou que deixan de existir as dúas escalas que viñan definidas desde o ano 2016 (centros singulares de investigación e agrupacións estratéxicas), para integrarse nunha única escala de centros de Investigación.

Ademais, esta convocatoria pretende atraer talento e mellorar a posición das universidades nas clasificacións internacionais. A partir dese dobre obxectivo, establécese un procedemento regrado para a acreditación, estrutura e mellora dos centros de investigación. Deste xeito, a partir de agora, para optar a este financiamento, os centros deberán someterse a un proceso de avaliación estandarizado que levarán a cabo recoñecidos expertos alleos ao sistema galego. Nesa avaliación, teranse en conta aspectos como a captación, formación e retención de talento; a investigación de referencia competitiva e a captación de fondos competitivos de centros nacionais e internacionais.

En base ao resultado dese procedemento, o financiamento pode variar entre un máximo de 1 millón de euros e un mínimo de 500.000 euros por centro, en función da cualificación obtida nesa avaliación.