A asociación Lazoiro realizará os días 16 e 17 de novembro, no Salón Parroquial de Alxén, en Salvaterra de Miño, unha exposición para poñer en valor a memoria e o patrimonio desta parroquia.

A apertura da exposición terá lugar o sábado 16, coincidindo co día do Patrimonio, o horario será de 10:00h a 13:00h e de 16:00h a 20:00h, o domingo 17 abrirá de 9:30h a 13:00h e de 16:00h a 18:00h.

A exposición contará con paneis onde se mostrarán datos dos elementos patrimoniais de Alxén. Entre o contido poderán verse fotografías, planos e textos. Toda a documentación pretende achegar aos propios veciños o seu patrimonio, en definitiva unha visión que enriqueza o coñecemento diario que teñen del. Está aberto a todo o público que se queira achegar. Haberá unha proxección que mostrará de xeito continuo material audiovisual (fotografías e vídeo aéreo) realizado na fase de preparación do contido.

O sábado 16, de 16:00h a 18:00h, organizarase unha andaina guiada para a aproximación ao Patrimonio, non será necesario realizar inscrición previa. O perfil é doado, dunha duración aproximada de tempo camiñando de 1h e 15 min., con paradas en puntos de interese para ofrecer datos aos asistentes. En caso de que as condicións do tempo non permitan a andaina realizarase, no mesmo local da exposición, unha charla sobre Patrimonio.

Dende Lazoiro explican “esta iniciativa pretende facer un labor de divulgación do Patrimonio Cultural da parroquia de Alxén, é o segundo ano que se leva a cabo este tipo de iniciativa de aproximar a acción da asociación ás parroquias, o ano anterior foi en Uma, e que pretende ter continuidade no tempo”.

Un dos obxectivos de realizar a exposición é, segundo afirman “a necesidade de coñecer máis sobre a memoria nas nosas parroquias, desta forma poderemos ampliar o proxecto de recuperación fotográfica Memoria de Salvaterra, no que levamos anos traballando”.