“SmartPeme” achega cinco xornadas de formación a Vigo

As oficinas do programa “Smartpeme” da Deputación de Pontevedra en Vigo, Ponteareas e O Porriño desenvolverán durante este mes de decembro un total de 15 accións formativas para a adaptación das empresas e proxectos emprendedores da provincia ao novo escenario dixital no que desenvolver as súas actividades e aproveitar as ferramentas existentes, co obxectivo de aumentar a súa competitividade. Deste xeito, “SmartPeme” oferta ás persoas emprendedoras e pemes da provincia unha serie de servizos de información, análise, asesoramento, capacitación, demostración, acompañamento e titorización no ámbito das TIC, sempre da man dos propios implicados e implicadas e coa colaboración das asociacións de empresarios e empresarias e de mozos e mozas autónomas.

A sede da Deputación en Vigo (rúa Oporto, 3) acollerá cinco obradoiros. “Deseña con Canva” terá lugar este xoves 5 de decembro, “Facebook Ads” levarase a cabo o martes día 10, “Mide os teus obxectivos en redes sociais: análise de estatísticas” impartirase o xoves 12 de decembro e “Copywriting aplicado a web e redes sociais” desenvolverase o martes 17 de decembro. Estes catro primeiros talleres realizaranse entre as 19:00 e as 21:00 horas mentres que o obradoiro de “Ferramentas de márketing dixital para empresas turísticas”, o xoves 19 de decembro, farase entre as 17:00 e as 19:00 horas.

As inscricións para tomar parte nestas accións formativas pódense facer no número de teléfono 886 20 20 20, no correo electrónico info.smartpeme@depo.es ou na páxina web www.smartpeme.depo.gal.