Vigo recibiu durante a Ponte da Constitución a un total de 700.000 persoas atraídas polo alumeado de Nadal instalado polo Concello. Os datos os fixo públicos este luns o alcalde de Vigo, Abel Caballero, durante a súa comparecencia ante os medios de comunicación na que avanzou que os controis levados a cabo detectaron cifras de ata 250.000 persoas ao día na contorna da árbore da Porta do Sol.

"Foi o nunca visto, batemos todos os rexistros e previsións de asistencia e ocupación, pero vai a ser aínda maior na ponte de Aninovo", avanzou o rexedor. Caballero explicou que a ocupación hoteleira foi do 100% e que os aparcamentos estiveron "ateigados", rexistrándose colas de entrada nos accesos á cidade e tamén cheo total en restaurantes e cafeterías. 

"Houbo restaurantes que esgotaron existencias, quedaron sen pan e seguiron servindo ceas", apuntou Caballero a modo anecdótico. Os datos tamén apuntan a que o Belén da Casa das Artes acudiron desde o pasado día 25 de novembro un total de 30.364 persoas, cando o ano pasado, no mesmo período foran 9.000 as visitas á instalación de Nadal.

O alcalde destacou que a masiva afluencia provocou que a ocupación hoteleira fose do 100% e que tamén houbo influencia na área metropolitana, desde o Val Miñor e Redondela ata O Porriño, así como en Sanxenxo e incluso Santiago e Ourense. 

Ademais, Caballero indicou que unha das novas iniciativas do Nadal, coma é os campamentos para nenos, xa recibiron un total de 400 solicitudes para inscribirse en algunha das 150 prazas dispoñibles.